Intxixu Trail, igandean, zortzigarren aldiz
Ergoien auzoan hasi eta bukatuko da 16 kilometroko mendi lasterketa. Oraindik izena eman daiteke, larunbat gauera arte.
Aiako Harria Parke Naturaletik ibiliko dira lasterkariak [Arg.: https://www.facebook.com/intxixutrail]. Intxixu Trail egingo dute zortzigarren aldiz, igande goizean (hilak 4). Pandemiaren erruz bi ekitaldi bertan behera utzi behar izan zituzten, eta iaz bueltatu ziren mendiko lasterketa egitera.
Ohi bezala, Ergoiendik aterako dira lasterkariak, bertako Uztapide/Urtxalle plazatik. Toki berean bukatuko dute, Aiako Harria Parke Naturaleko parajeetan barrena antolatutako ibilbidea egin ondoren.
Ibilbide horrek 16 kilometro izango ditu denera, eta 901 metroko desnibel positiboari aurre egin beharko diote lasterkariek.
Bakarka, taldeka edo familian izena ematera animatu dute antolatzaileek. Dozenaka korrikalarik bere parte hartzea ziurtatu duten arren, oraindik tokiak daudela jakinarazi dute Intxixu Trailen antolatzaileek.
Izen ematea Herrikrosaren webgunean egin behar dela jakinarazi dute, eta epea biharko 23:59an bukatuko dutela ohartarazi dute. 20 euroko prezioa du dortsalak; oiartzuarrenak, 16koa.
