"Prekarietateak eta sistema kapitalistak lanean hiltzera kondenatzen gaituzte"
Ezker abertzaleak deituta, elkarretaratzea egin dute, igandean hil zen garraiolariaren heriotza salatzeko asmoz.
Done Eztebe plazan egin zuten elkarretaratzea, atzo. Pasa den igandean, 61 urteko garraiolari bat hil zen, lan-istripu “ez-traumatikoan”, LABek jakinarazi zuenez. Oiartzungo Transportes Insaustin egiten zuen lan.
Ezker abertzaleak deituta, elkarretaratzea egin zuten atzo Done Eztebe plazan, Euskal Herrian lanaren ondorioz hil den 26. pertsonaren heriotza salatzeko.
Orokorrean, lan-istripuan hildakoen %33 dira “ez-traumatiko” bezala tipifikatuta. Garraiolarien kasuan %75era igotzen da. “Honek argi erakusten du, garraiolarien lan baldintzek istripu kardiobaskularretan duten eragin zuzena, lanpostuen prekarizazio etengabea tarteko”, adierazi zuen ezker abertzaleak.
Gaineratu zutenez, lan-istripu ez-traumatikoak “gaizki izendatuta” daude, “bere horretan traumatikoak” direlako. “Zoritxarrez lanean hiltzera kondenatuak daude gure garraiolariak gaur egun”.
Nabarmendu zuten garraioarena dela lan-istripu “gehien” pairatzen duen sektorea. Lan-istripuak “lan-baldintza txarren” eta “segurtasun-neurri faltaren” ondorio direla salatu zuten.
“Oso prekarioak dira garraioaren sektoreko lan-baldintzak, lanaldi luzeak, estresa, presioak, garraioagatik ordaintzen den prezio baxua, lan-baldintzen eraginez modu osasuntsuan elikatzeko zailtasunak… Horregatik diogu garraio-sektorean istripuak guztiz ekidin daitezkeela”, esan zuten.
Beraien ustez, ez da “kasualitatea” garraiolariak euren lanpostuan hilda aurkitzea. “Egoera horrekin bukatu beharra dago, eta horretarako borondate politikoa baino ez da falta, baita erakunde publiko eta enpresa guztien inplikazioa ere”, zehaztu zuten.
“Prekarietatearekin” zein “patronalaren inpunitatearekin” bukatu behar dela aldarrikatu zuten, eta erakundeei eskatu zieten “beste alde batera begiratzeari” uzteko. “Bestela”, jarraitu zuten, “gertatutakoaren konplize bihurtuko dira”. “Behin eta berriz diogu prekarietateak eta sistema kapitalistak lanean hiltzera kondenatzen gaituztela. 26 langile hil dira aurten Euskal Herrian. Aski da!”.
