Txomin Perurena, bizikleten lapur izatetik (ia) dena irabaztera
1965 eta 1979 urteen artean txirrindulari profesionala izan zen, eta hamarnaka garaipen lortu zituen. 79 urterekin hil da.
Txomin Perurena, oiartzuarren aitortza jaso zuenean. Txomin Perurena txirrindulari eta kirol zuzendari ohia hil da gaixotasun baten ondorioz, 79 urterekin. 1943ko abenduaren 15ean jaio zen. Vittorio de Sica italiarraren filmaren antzera, Altzibarko taberna bateko bezeroei bizikletak lapurtzen hasi zen bi gurpilen gainean ibiltzen.
Horrela kontatu zuen 2017ko xanistebanen aurreko kultur ekitaldian. Urte hartan berak bota zuen festetako txupina, Lasa anaiekin batera.
Oiartzungo aldapetan gora eta behera ibiltzen zen mutiko hura txirrindulari profesional bihurtu zen 1965ean. 1979 arte izan zen profesional, eta urte horietan palmares izugarria bildu zuen.
158 garaipen lortu zituen 1966 eta 1979 artean. Diziplina guztietan moldatzen zen ongi: Espainiako Itzulian puntukako sailkapena irabazi zuen bi aldiz; 1974 Tourrean mendikoa, puntu gorridun maillota ezarri baino urtebete lehenago…
1975eko Espainiako Itzulia irabazteko zorian izan zen, eta bera da itzuli hori irabazi gabe liderraren maillota aldi gehienetan jantzi duen txirrindularia.
Pirinioetatik harago ez zituen garaipen asko lortu, baina Italiako Giroan bi etapa poltsikoratu zituen. KAS taldearen figura nagusia izan zen, eta etxeko astebeteko lasterketa nagusian —Euskal Herriko Itzulian— 11 etapa lortu zituen.
Punta-puntako txirrindularia izan zen, eta 1974an, puntu gehien zakuratu zituen laugarren txirrindularia izan zen.
Erretiratu ondoren, ez zuen errepidea utzi, eta Orbea, Caja Rural eta Euskalteleko zuzendari izan zen. Komentarista lanak ere egin zituen.
Bere 158 garaikurrak jaioterriko udalari eman zizkion duela sei urte.
Tourrean irabazitako mendiko sari hura etapa bat irabazteagatik aldatuko lukeela pentsatzen zuela adierazi zuen 2017ko solasaldi hartan. “Baina handik urte batzuetara”, aitortu zuen Perurenak, “jendea etortzen zitzaidan bere seme-alaba edo bilobei esanez ‘Honek mendiko saria irabazi zuen’ eta hobeto pentsatu nuen”.
Txirrindularitzan utzi duen ondarea sari hura baino gehiago askoz handiagoa da.
