Harrera herria izaten ari da Donibane
Hilaren 1ean ekin zion Donibaneko Bixi Bixi elkarteak 'Gora Herriak' jaialdiari. Bihar, bada, 'Azken festa handia' ospatuko dute; kalejira, herri bazkari eta musika nahiz bertsolariak lagun.
Hilaren 1ean ekin zieten Donibaneko Bixi Bixi elkarteak antolatutako Gora Herriak jaialdiari. Euskal Herriaren eta munduko beste herrialdeen arteko sareak ehuntzeko hamabost eguneko dinamika abiatu zuten sanjuandarrek. Iaz Irlanda izan bazuten muin, aurten harrera bila euren etxeetatik alde egitera behartuta bizi direnak izaten ari dira protagonista nagusiak, bereziki hegoaldetik datozen migratzaileak. Inor ez da ilegala. Ongi etorri errefuxiatuak lelopean ari dira aurtengoa ospatzen.
Gaur, ostirala, asteburukoari aurre egiteko atsedena hartuko dute, baina bihar bai, izango dute zerekin gozatu eta hausnartu sanjuandarrek. «Azken festa handia» izango da biharkoa, egun osoko egitarau oparoa prestatu baitu Bixi-Bixik. 12:00etan hasiko dute festa egun handia. Meipitik Mazedonia kalejira abiatuko da. Ondoren, 14:30ean, herri bazkaria egingo dute Meipin. 17:00etan berriz, ekitaldi nagusia egingo dute bertan, Gu berri bat osatze bidean izeneko emanaldia eskainiko dute Lintxua dantza taldekoen partaidetzarekin besteak beste: musika, bertsolariak eta testigantzak entzuteko aukera izango da. 18:00etan EH 11 kolore izeneko batukadak barrutiko kaleak girotuko ditu, eta ondoren, 19:00etan, Elektrutxufla txarangaren txanda helduko da. Eguna biribiltzeko, DJ Sound Systemek musika afrikarreko saio berezia eskainiko du Meipin, elkartearen egoitzaren parean, 21:00etan.
Biharko herri bazkariari dagokionean, “Munduko arrozak” izenpean antolatu dute jarduera; izan ere, herrialde desberdinetako janariak dastatzeko aukera egongo baita. Zehazki, jatorriz Sahara, Kamerun, Senegal, Euskal Herria, Pakistan, Katalunia, Turkia eta Marokoko hainbat lagunek hartuko dute parte.
