San Joan suak pizteko oharrak eman ditu Udaltzaingoak
Udarari ongietorria emateko suak nola, zerekin eta non egin ahalko diren zehaztu du Pasaiako Udaltzaingoak.
San Joan sua Donibanen, artxiboko irudia. 
Datorren ostiralean udako solstizioa ospatuko dute pasaitarrek. Orotarikoak izan ohi dira sanjoanak ospatu eta udarari ongietorria egiteko ekitaldiak, baina zerbaitetan datoz guztiak bat: batean ala bestean, suak piztuko dituzte.
Hori egin ahal izateko segurtasun gomendioak eman ditu Pasaiako Udaltzaingoak, ohar bidez. Lehen betebeharra sua egiteko asmoaren berri ematea izango da. Alegia, Pasaian sua piztu nahi duen orok udalari aldez aurretik jakinarazi beharko dio hori, Udaltzaingoaren bitartez. Horretarako Trintxerpeko Alkateordetzako bulegora bertaratu edo 943 00 43 30 telefonora deitu beharko dute, arduraduna izango den norbanakoaren datuak emateko (adinez nagusia beharko du).
Honakoak dira San Joan suak pizteko udaltzainek egin dituzten ohar eta gomendioak:
- Ez da surik egingo etxebizitzetatik, ibilgailuetatik eta sasietatik gertu. Gutxienez 15 metroko tartea utziko da, edo suaren altuera halako bostekoa. Ez da surik egingo zuhaitzen azpian, edo linea elektriko edo telefonikoen azpian.
- Sua asfaltatutako edo harriztatutako eremuetan egiten bada, estali beharreko azalera gehi bost metro babestu behar dira, gutxienez, hamabost zentimetroko lur edo harea geruza batez.
- Sua pizteko, papera, lasto lehorra, ezpalak edo barbakoa pastillak bakarrik erabil daitezke.
- Ez da sutara bota behar material sukoirik (gasolina, pinturak, disolbatzaileak…).
- Ez dira sutara bota behar pneumatikoak, goma-aparrak, plastikoak, aerosol-potoak, eta lehertu edo ke toxiko edo kaltegarriak isur ditzaketen materialak.
- Ez da etxeko-tresnarik edo altzaririk bota behar.
- Ez da bota behar haizeak arrastaka eraman dezakeen paper, kartoi, oihal edo belarrik, sutea zabal ez dadin.
- Sutik gertu izan behar dira ur-mahuka, su-itzalgailua edo sua jotzekoa.
- Sua itzali arte zaindu behar da, eguraldi aldaketaren bat gertatzen bada ere (haizea).
- Suaren arduraduna beti sutik gertu egongo da, eta lekua utzi aurretik ziurtatu behar du ez dela txingarrik geratzen. Sua hozteko ura erabil daiteke, edo sua lurrez edo hareaz estali.
Trafikoari dagokionez, Donibanen, jakina, sanjoanek eragina izango dute ibilgailuen aparkaleku eta joan-etorrietan (hemen kontsulta daitezke horiek). Horrez gain, Trintxerpeko Euskadi etorbidea erabat moztuko dute ostiral arratsean, 19:00etatik 02:00etara. Trafikoa portu eremutik bideratzeko seinaleak jarriko ditu Udaltzaingoak.
