Enpresen eta pertsonen arteko zubiak eraikitzeko, Harrobiak proiektua
Harrobiak proiektuarekin gizarte bazterketako egoeran edo arriskuan dauden pertsonen egoera sozio-laborala hobetu nahi dute.
Gizarte bazterketako egoeran edo arriskuan dauden pertsonen egoera sozio-laborala hobetzeko helburuz, otsailetik Harrobiak egitasmoa abian da Oarsoaldean, 2024ko azarora arte. Enpresen eta euren egoera sozio-laborala hobetu nahi duten pertsonen arteko zubi lana egitea da Harrobiak-en zeregina.
Asmo horiek bideratzeko, bost talentu topaketa sektorial egitekoak dira Oarso Sare proiektuaren barruan. Lehena martxoaren 14an egin zuten, eta bigarrena hilaren 14an; lehen horretan teknologia sektoreko enpresen eta euren egoera hobetu nahian dabiltzan pertsonen artean, eta bigarrenean Peñascal taldeak Errenterian duen egoitzan bildu ziren. Bien artean 18 enpresa bertaratu ziren, eta egoera zaurgarrian dauden edo egoteko arriskuan dauden 40 pertsonatik gora izan ziren lan bila. Urrian izango da hirugarren elkartrukea.
Topaketa horietan hainbat dira lantzen diren gaiak, hala nola, enpleguarekin zerikusia duten gaiak; eskatzen dituzten profilak; langileak kontratatzeko unean dauden zailtasunak; egoera zaurgarrian dauden pertsonen beharrak, eta egoera administratibo irregularrean egoteak dituen zailtasunak.
Harrobiak proiektua Gipuzkoako Foru Aldundiaren Elkar-Ekin Lanean estrategian barruan kokatzen da, eta Zabalduz Kooperatiba Elkartetik koordinatzen da, Oarsoaldea Garapen Agentziarekin, Peñascal taldearekin, Katea Legaiarekin eta Adecco Fundazioarekin elkarlanean.
