[Galeria eta bideoa] Gazteak protagonista sanjoanen hasieran
Aitana Lizarazu eta Oihan Arbonak eman diete ongietorria San Joan ospatzeko jaiei. Bizilagunak "urte osoko kezkak erretzera" deitu dituzte.
Ikurrinaren igoera egin dute bi protagonistek. 
Hasi dira sanjoanak. Aitana Lizarazu eta Oihan Arbonak eman diote ongietorria aurtengo ospakizunari, Donibaneko udaletxe zaharreko balkoitik. Iaz txupinazoko suziria bota zuten Izaro Duran eta Danel Castillok jantzi diete zapia, testigu moduan.
Bata bestearen atzetik, taldetxo txikietan, 2023ko sanjoanei ongietorria emateko bertsoak bota dituzte herriko gaztetxoek balkoi beretik [bideoan saioetako bat]. Kantetan, herria ospatu eta gauean izango den suarekin gaitzak erretzera gonbidatu dituzte bizilagunak. Txupinazoaren arduradunek “urte osoko kezka eta nekeak” erretzeko unea heldu dela esan dute.
Doinudun nahiz doinu gabeko diskurtsoak bukatuta, Lintxua dantza taldeak agurra dantzatu die udaletxeko gazteei, eta esker ona urtero bezala adierazi diete goikoek: gozokiak balkoitik jaurtita. Horiekin, gehi jarraian jaurti dituzten koloredun puzgarriekin, baten batek esku gehiago izatea desiratu du ziur.
22:00etan piztuko dute plazako sua, eta jarraian musika izango da, herritarren gozagarri. Egunotako egitaraua hemen klik eginda kontsulta daiteke. Bitartean, hortxe gaurko txupinazoko ekitaldiak utziriko zenbait une:
