Frantziako Tourrak aldaketak eragingo ditu trafikoan
Uztailaren 2an izango dira mozketa nagusiak, Oiartzungo sarrera-irteerak eta errepide nagusi asko itxiko dituzte, ordu luzez gainera.
Datorren uztailaren 2an eta 3an Frantziako Tourra herritik igaroko da. Lasterketak herriko trafikoan eragina izango duela jakinarazi du udalak, Oiartzungo sarrera-irteerak eta errepide nagusi asko itxiko dituzte, ordu luzez gainera.
Igandean (uztailak 2) izango dira mozketa nagusiak, herri erdi-erditik igaroko baitira txirrindulariak. Txipitoko maldatik jaitsi eta Ugaldetxotik gora, Elizaldetik pasa eta Gurutzera joango dira, Irungo bidea hartzeko. 16:15ak inguruan pasako direla aurreikusi badute ere, 13:00etan itxiko dute errepidea, 17:00ak arte.
Tarte horretan ezingo da bertatik autoarekin pasa, eta behin karabana pasata (14:30ean pasako da) oinezkoek ere ezingo dute errepidea gurutzatu. Hortaz, Iturriotz, Altzibar, Karrika, Ergoien, Elizalde eta Gurutzeko auzotarrek ez dute herritik ateratzeko ia aukerarik izango lau orduz. Aritxulegiko bidea bakarrik izango da zabalik. Autobusek ere ezingo dute errepidea erabili.
Uztailaren 3an (astelehena da) ez da hainbesteko aldaketarik izango. Errenteria-Oreretatik helduko dira txirrindulariak, eta Lintziringo errepidetik joango dira Irunera, 16:00ak inguruan. Ondorioz, Arragua eta Errenteriako errepidea itxiko dituzte, 12:30etik 16:30era. Ez da E2 eta E4 zerbitzurik izango tarte horretan. Egun horretan herritik ateratzeko Euskotren zerbitzua erabiltzea gomendatu du udalak. Hori bai, Xorrola erabilgarri izango da normaltasunez.
Trafiko aldaketa guzti hauen berri emateko esku orriak banatzen hasi da udala.
