"Herriartekoa bigarren aldiz jarraian irabaztea lorpen handia izan da"
Oiartzunek Esku Huskako Gipuzkoako Herriarteko Txapelketa irabazi du asteburuan, Azpeitiaren kontra. Uztailean Euskal Herrikoa jokatuko dute.
Historian hirugarrenez jantzi dute txapela oiartzuarrek. Handia egin du Oiartzunek. Iaz bezala, Esku Huskako Gipuzkoako Herriarteko Txapelketa irabazi du. Eta iaz bezala, Azpeitia izan da biktima.
Larunbat arratsaldean jokatu zuten finala, Donostiako Atano III.a pilotalekuan. Oiartzuarrak ez ziren ongi hasi, Manex Olaiz eta Aitor Etxeberria kadeteek osatutako bikoteak 22-14 galdu baitzuen.
Oiartzuarrak beste bi partidak irabazi behar zituzten nahi eta nahi ez. Oier Zabaleta eta Mikel Leonetek jubenilek eman zuten txapela eskuratzeko lehen pausoa, 22-17 irabazita.
Dena seniorren partidan erabaki behar zen. Oihan Etxeberria eta Unax Landak 16 tantoan utzi zituzten arerioak. Partida oso onak eta gogorrak izan ziren, baina oiartzuarrek hirugarren aldiz lortu zuten Herriartekoa irabaztea, 2013 eta 2022ko balentriak errepikatuta.
Atano III.etik Oiartzungo udaletxera joan ziren, zuzenean, txapela ospatzera. Edorta Fernandez eta Aiako Harria Gaztelumendi zinegotziek egin zieten harrera, pleno aretoan.
Ondoren balkoira atera ziren, herriko plaza nagusian zeuden oiartzuarrei lortutakoa eskaini eta elkarrekin ospatzera.
Ibilbideari errepasoa
Asier Retegi Oiarperen ordezkaria da. Txapelketari errepasoa eman dio. “Txapelketa hasi aurretik, koadroa ikusi genuenean, bagenekien aurrekoetan baino lan dezente gehiago egin beharko genuela, bai finalera iristeko baita finala irabazteko ere”, aitortu du.
Lehenengo arerioa Zaldibia izan zen, iaz bezala. “2022koak ikusita, bagenuen esperantza ongi ateratzeko”, esan du Retegik. “Gero Azkoitia eta Ataunen kontra lan handiagoa izan genuen”.
Azkoitiaren kontrako joaneko partidak Madalensoron jokatu zituzten, eta bi garaipen lortu zituzten. “Itzuliko partidetarako lan erdiak behintzat eginda utzi genituen. Tanteoa oso alde genuen; Azkoitian partida bat irabaztearekin ia nahikoa genuen”. Modu horretan, “konfiantza handiagoarekin” joan ziren Urola eskualdeko herrira; han beste bi partida poltsikoratu zituzten.
Finalerdietan Ataun egokitu zitzaien. Goierrin partida bakarra irabazi zuten oiartzuarrek, baina oso aldeko tanteoarekin aurre egin zieten itzuliko partidei, Madalensoron. “Madalensoroko partidetan garbi zegoen, bi irabaziz gero, gurea zela. Kadeteena, aurretik bezala, erraz irabazi genuen, eta bat gehiago atera behar genuenez, zorionez irabazi genuen”, gogorarazi du Retegik.
Txapelketako azkeneko geltokia larunbatean izan zen. Hiru partida “gogor” aurreikusi zituzten, eta hala izan zen. Oiartzuarren babesa eskertu du Retegik: “Inoiz baino babes handiagoa sentitu genuen. Azpeitiarrak normalean asko izaten dira, baina Oiartzundik ere jende asko mugitu zen. Bultzada jaso genuen, eskertzekoa erabat”.
Kadeteen partida “zaila” espero zuten, eta intuizioak ez zien hutsik egin, zoritxarrez. “Derrigorrez beste biak irabazi behar genituen, eta zorionez, hala izan zen”.
“Ez da belaunaldi edo pilotari baten kontua”
Retegik berretsi du Herriartekoa irabaztea “lorpen handia” izan dela beraientzako. “Txapelketa hau irabaztea zaila da, eta bi aldiz jarraian irabaztea, oraindik zailagoa”, nabarmendu du Retegik.
Belaunaldi “polita” egokitu zaiela gaineratu du. Lan onaren emaitza jasotzen ari da Oiarpe eta Oiartzungo esku pilotaren mundua. “Azkeneko 11 urteetan sei final jokatzea, hala ere, ez da belaunaldi baten gauza bakarrik. Nire ustez, gauzak ongi egiten ari gara, eta zaletasuna ere badago. Emaitzak hor daude; ez da belaunaldi edo pilotari talde baten kontua”.
Gipuzkoako Herriartekoa irabaztea beraientzako “garaipen handia” izanagatik, orain txapel garrantzitsuagoa izango dute jokoan: Euskal Herrikoa. Iaz irabazi zuten, eta irabazi dutenarekin asebeteta badaude ere, iazkoa errepikatzea gustatuko litzaieke, denboraldiari ginga jartzeko, Retegik aipatu duenez.
Uztailaren 15 edo 16an jokatuko dituzte finalerdiak, eta hil horren 23an izango da final handia. “Ea zozketa nola ateratzen den, eta finalerdia, behintzat, samurragoa izaten den. Orain horren bila joango gara”.
