Oiartzungo turismo bulegoa uztaila iristearekin batera irekiko dute
Arizmendieneko sarreran kokatuta egongo da turismo bulegoa. Irteera, txango eta abarren berri emango diete Oiartzun bisitatzen dutenei.
Arizmendieneko sarreran egongo da turismo bulegoa. Datorren larunbatean —uztailak 1— irekiko dute Oiartzungo Turismo Bulegoa. Irailaren 3ra arte egunero irekita egongo dela jakinarazi dute. Goizetan 09:00etatik 14:00etara emango du zerbitzu, eta arratsaldetan, 16:00etatik 19:00etara.
Hurbiltzen den bisitariak Oiartzungo eta eskualdeko baliabide turistikoak, gastronomia, kultura-ondarea eta naturari buruzko informazioa jasoko du bertan.
Horrez gain, hainbat jarduera erreserbatzeko aukera izango du. Honakoak izango dira, besteak beste: Arditurriko meategia, Tren Berdean irteerak, Doneztebe elizara bisita gidatuak…
Arizmendienera bisitak
Arizmendienea bisitatu nahi dutenentzat doako bisita zerbitzua eskainiko dute. XVIII. eta XIX. mendeko goi-klaseko familiaren bizimodua erakusten du. Aurten, gainera, bederatzi maniki jarri dituzte etxeko hainbat txokotan garaiko jantziak irudikatuz; Errenteriako Jantziaren Zentroarekin elkarlanean.
Bisita gidatuak uztailaren eta abuztuaren ostiraletan, larunbatetan eta igandetan eskainiko dituzte. Hau izango da ordutegia:
- Ostiralak: Euskaraz, gaztelaniaz edo frantsesez, 12:00etan.
- Larunbat eta igandeetan: euskaraz, 10:00etan eta 12:00etan; gaztelaniaz, 11:00etan eta 13:00etan.
Bisita horiek aurretik erreserbatu beharko dira.
