San Pedroko jaien harira, trafiko aldaketak
Asteazkenetik ezingo da ibilgailuarekin sartu Arraunlari kalean, San Pedroko kaian, Torreatzean eta Ondartxo pasealekuan. Hospitalilloko kaiaren barrualdean aparkaleku bat egokituko dute.
Iazko jaietan ateratako irudia. Etzi (hilak 28) abiatuko diren San Pedroko jaiek zenbait trafiko aldaketa eragingo dituztela jakinarazi berri du Pasaiako Udalak. Asteazkenetik (hilak 28) ezingo da ibilgailuarekin sartu Arraunlari kalean, San Pedroko kaian, Torreatzean eta Ondartxo pasealekuan. Hori bai, inguru horietan egingo dituzten ekitaldiak bukatu ondoren bertakoek eta zamalanek egin behar dituztenek izango dute sartzeko aukera soilik.
Xehetasun gehiago eman ditu udalak. Asteazkenean (hilak 28) arratsaldez Arraunlari kalea itxiko dute, 17:00etatik aurrera. Ostegunean (hilak 29) ere Arraunlari kalea itxiko dute, oraingo honetan 10:00etatik aurrera. Ostiralean (hilak 30), larunbatean (uztailak 1) eta igandean (uztailak 2) ere 10:00etatik aurrera itxiko dute kale hori, baina egun osoz. 18:00etatik aurrera normaltasunez aparkatu ahal izango da bertan.
Ordutegi guzti horiek “gutxi gorabeherakoak” direla diote udaleko iturriek, eta Udaltzaingoak aldatu ahal izango dituela, “trafiko eta segurtasun arrazoiak tarteko”.
Aparkatzeko aukera bermatu ahal izateko, ostiraletik uztailaren 2ra bitarte aparkaleku bat egokituko dute Hospitalilloko kaiaren barrualdean. Eremu mugatuetako bizilagunek ibilgailuak gune horietatik kanpo eta egokitutako aparkalekuetan uzteko gomendatu du udalak.
Informazio gehiagorako, 943 00 43 00 telefono zenbakira hots egin dezakete herritarrek.
