Eskalantegi 45 atariko bizilagunen "miseriazko egoera" salatu dute
Euren etxeetara sartu zirenetik bizilagunen arteko ezinegona "handituz" joan dela salatu du Etxebizitza Sindikatuak, "gehiegizko prezioak, baldintza txarrak eta Alokabideren kudeaketa negargarria eta axolagabea direla eta".
Pasai Antxoko Eskalantegi kaleko 45. zenbakiko bizilagunek protesta egin zuten atzo, Oarsoaldeko Etxebizitza Sindikatuak babestuta. Eraikinaren atarian elkarretaratzea egin zuten, “alokairu sozialeko blokean bizi diren miseria baldintzak salatzeko”.
Atzokoan salatu zutenez, euren etxeetara sartu zirenetik bizilagunen arteko “ezinegona handituz” joan da, “gehiegizko prezioak, baldintza txarrak eta etxebizitza sozialen arduraduna den Alokabideren kudeaketa negargarria eta axolagabea direla eta”.
Egoera hau salatzeko “hamaika arrazoi” daudela esan zuten. Eta horien artean, besteak beste, “ordaindu beharreko komunitate tasaren izaera neurrigabea” aipatu zuten, “edozein unetan alokairu kontratua berritzeko nahiari ezezkoa eman diezaieketela jakin badakitelarik”.
Bizilagunek uraren eta gasaren prezio “neurrigabea” ordaindu behar dutela ere salatu nahi izan zuten, eta honek “ordaindu ezinezko zorrak” eragin dizkietela. “Kasu horietan, ur beroa eta berogailua hornitzeko zenbait enpresa bitartekari ari dira etxe bakoitzari hiru hilean behin 1.000 eurotik gorako fakturak kobratzen”. Egoera hau ez dutela soilik 45. zenbakikoek pairatzen diote, mankomunitatea osatzen duten babes ofizialeko beste hainbat atarietako bizilagunek ere prezio horiek jasan behar baitituzte.
Bestalde, bizilagunek bloke osoan bozka bakarra dutela ere salatu zuten, “euren hitza hutsaren hurrengoa izatera kondenatuz”.
Alokabidek, gainera, bertan bizi den pertsona bat etxetik bota nahi duela ere jakinarazi zuten, “instituzio honek etengabeko presioak era jarraian burutzen diharduelarik”.
Etxebizitza Sindikatuko kideen arabera, Alokabide da “auzokideentzat jasanezina den egoera honen erruduna, entzungor egin baitie bizilagunek hasieratik buruturiko kexa eta erreklamazioei”. Berehalako neurriak exijitu zituzten atzo.
