Dena prest itsaso osasuntsu baten aldeko zeharkaldirako
Hilaren 28ra bitarte euskal kostaldeko 8 udalerri bisitatuko ditu Mater ontziak. Bisita gidatuak, itsasora irteerak, tailerrak, jolasak eta proiekzioak egingo dituzte, besteak beste.
Bilbon aurkeztu dute bosgarren edizioa. Mater ontziak dena prest du bosgarren Zero Zabor Uretan egitasmorako. Euskal kostaldeko 8 herri bisitatuko ditu ontziak datorren hilaren 28ra bitarte. Bisita gidatuak, itsasora irteerak, tailerrak, jolasak eta proiekzioak antolatu dituzte, besteak beste. Aurten, gainera, Plastic Free July kutsadura plastikoaren kontrako nazioarteko hilabetearekin bat egin dute.
Kanpaina honek “gizarte eragile ezberdinen artean komunitatean hondakinen arazoari buruzko hausnarketa sustatu eta irtenbideak bilatzeko prozesu parte hartzaile bat sortzea” du helburu, hori azaldu dute gaur Bilbon (Bizkaia) egin duten aurkezpenean.
Azken hilabeteetan “marinel ondarea babesteko” lanean aritu dira egitasmoan parte hartuko duten udalak, ikastetxeak, kultur elkarteak eta komertzioak, “aktiboki parte hartuz”. Hala, bi erraldoi berezi sortu dituzte etxeko txikienek (goiko irudian ikus daitezke): Zabor, “itsasoan bildutako hondakin plastikoekin egindako itsas zaborren munstroa”, eta Bio, “biodibertsitatearen dama, algaz, koralez eta kakorratzez ehundutako hainbat espeziez osatuta”. Bi figura hauek erraldoi egin dituzte, “haien garrantziaz behingoz jabetu gaitezen”. Sentsibilizazio kanpaina bat izan da, “gure kontsumo arduratsuaren bitartez hondakinen eragin negatiboa murrizteko eta bizitzaren zaintza areagotzeko mezua helarazteko”. Haurrek kartel deigarriak egin dituzte kartoizko euskarrietan.
Bi erraldoi hauek Materrek bisitatuko dituen herrietan martxa egingo dute.
Programazioa osoa lotura honetan kontsulta daiteke edo bestela, 619 81 42 25 telefono zenbakira deitu daiteke.
