'Erriola' kantaren bideoklipean parte hartzera deitu du Orereta Ikastolak
Hilaren 13ko goizean errodatuko dute Kilometroak urte osoko festaren kanta. Ondartxon geratu dira, eta zubietara mugituko dira.
Erriola aurkeztu zen ekitaldiko irudia. Aurten Orereta Ikastola egiten ari den Kilometroak jaialdiaren hurrengo geltokia zein izango den jakinarazi dute: bideoklipa errodatuko dute.
Janus Lesterrek Jon Maiaren hitzekin egindako Erriola abestiari irudiak jarriko dizkiote datorren ostegunean, hilak 13. Ikastolaren komunitate osoari gonbita egin diote: “Ikasleak, familiak, langileak, ikasle ohiak, bazkideak… Eta hala nahi duen herrikide oro!”.
09:30ean geratu dira, Ondartxoko Matadero zaharrean. Aurreratu dutenez, errodatzeak 13:00ak arte iraungo du, gutxi gorabehera. Herriko zubietan hartuko dituzte irudiak, eta bertaratutakoek Erriola kantaren koreografia dantzatuko dute.
Bideoklipean parte hartu nahi dutenek galdetegi bat bete beharko dute, hobeto antolatu eta aurreikusi aldera. Hilaren 11 —datorren asteartea— izango da horretarako azkeneko eguna.
“Goizpasa polita dugu zain. Goiz osoan etortzeko aukerarik ez baduzue ere, zatozte tarte batean”, egin du gonbita Orereta Ikastolak. Erriolaren arropak edo osagarriak eramatera animatu dute, halaber.
