Elkar zaintzeko sarea josten hasiko dira, Zaintzadiren bitartez
Auzozainak izeneko figura sortuko dute; hautazkoa ez den bakardadea egoeran dauden pertsonak komunitatera berriro konektatzen lagunduko dute.
Asteleheneko aurkezpen ekitaldira joateko gonbita egin dute Aintzane Iribar Zaintzadiko dinamizatzaileak eta Garazi Urdanpilleta alkateordeak. Oiartzungo Udalak duela urtebete jarri zuen martxan Zaintzadi proiektua, hautazkoa ez den bakardade egoeran dauden Oiartzungo helduen bizi kalitatea hobetzeko asmoz. “Zaintza sare publiko-komunitarioa” da horretarako tresna.
Ordutik, herriko diagnostikoa egiteaz gain, bakarrik egon edo sentitzen diren pertsonak detektatu, proiektuaren berri eman eta interesa azaldu dutenen beharrak identifikatu dituzte Zaintzadiko dinamizatzaileek.
Orain herritarren eta eragileen zaintza-sarea osatzen hasiko dira orain. Astelehenean —hilak 17— izango da lehenengo bilera.
Landetxeko jubilatuen egoitzako egongelan izango da bilera, 18:30ean hasita. Auzozain izeneko figura sortu dute, eta horren berri emango dute, haien funtzioa zein den azaldu eta boluntarioak lortzeko.
Auzozain, edonor
Udalak zehaztu duenez, asko dira auzozainek bete ditzaketen funtzioak. Boluntario bakoitzaren denboraren edo interesaren araberakoa izango da egingo duten ekarpena.
Figura berri horrek zertan datza aurreratu du udalak: “Auzozainak izango dira hautazkoa ez den bakardade egoeran dauden pertsona hauek komunitatera birkonektatzen lagunduko dutenak, gizarte hezitzaileen jarraipenarekin”.
Zaintzan eta akonpainamenduan ez ezik, detekzioan giltzarri izango direla nabarmendu dute. Horren arrazoian sakondu dute: “Beraien funtzioa izango da bakarrik sentitu edo egon daitezkeen pertsonei egitasmoaren berri emateko, edo proiektuan parte hartzen duten pertsonen egoeran gorabeheraren baten berri emateko”.
Parte hartzeko hainbat modu egongo direla iragarri dute: telefono dei bat eginez; paseatzera ateratzen; bakarrik sentitu edo egon daitekeen norbaiti proiektuaren informazioa eskainiz…
Horien guztien berri emango dute asteleheneko aurkezpenean. Udalak oiartzuarrak gonbidatu ditu bertara joan daitezen.
