Datorren astean hasiko dira Gaztañoko igogailua eraikitzen
Maria Lezo eta Zabaleta Anaiak kaleak batuko ditu irisgarritasun azpiegitura berriak. 659.000 euroko inbertsioa egingo du udalak.
Gaztaño auzoa eta erdigunea (eta alderantziz) batuko dituen igogailua eraikitzeko lanak datorren astean hasiko direla iragarri du Errenteriako Udalak: Maria Lezo eta Zabaleta Anaiak kaleen artekoa izango da. Udalaren Irisgarritasun Planaren barrukoa da hirigintza eta mugikortasun ekintza, eta osotara 659.450 euroko aurrekontua dute. Igogailua bakarrik ez: inguruan irisgarritasuna hobetzeko obra osagarriak egingo dituzte.
Irisgarritasuna eta oinezkoen konektibitatea hobetzea du asmo udal planak. Hala, tokiko erakundeak oroitarazi du Gaztañokoa ez dela egitasmo isolatua. Adibidez, Beraungo Juan Crisostomo Arriaga eta Maurice Ravel kaleen arteko bi tramoko igogailua (540.000 euroko kostua izan zuen) berriki martxan dela jakinarazi du, eta Beraun etorbidearen eta Juan Lavilla kalearen artekoan 1,1 milioiko inbertsioa egin dela. Fanderiakoa berritzen 205.000 euro erabili dituzte.
