Webgune eta App berriak ditu Arditurri parketxeak
Oiartzungo Udalak eta Oarsoaldeko Garapen Agentziak sortu dituzte bi euskarriak Arditurri Bide Berdearen berri emateko helburuarekin. Guztien eskura daude orain.
Arditurri Bide Berdea, Arditurriko meatzetako materiala Pasaiako portura garraiatzeko trenbide zaharrak zeharkatzen zuen bidea da, eta egun, Oarsoaldeko aisialdi eta naturgune “nagusietako” bat bilakatu da. Oiartzungo Udalak, Oarsoaldeko Garapen Agentziarekin batera, bide horren berri emateko webgune eta App berri bat sortu dute, Eusko Jaurlaritzaren Berpiztu programari esker.
Alde batetik, webgune berria abiatu dute: arditurriberdea.eus. Orrialde berriak bide berdearen interesgune nagusiak eta meatze gunearen informazioa biltzeaz gain, Arditurriko meatzeak bisitatzeko sarrerak erosteko aukera du ere. Gainera, mapa interaktibo bat aurki daiteke bertan, Errenteriaraino heltzen dena. Lau hizkuntzatan dago irakurgai: euskaraz, gaztelaniaz, frantsesez eta ingelesez. Arditurriko informazioaz gain, inguruan egin daitezkeen plan proposamenak plazaratu dituzte.
Bestetik, App “berritzaile” bat kaleratu dute. App-ak bide berdean zehar joateko gida birtuala (audiogida eta 360ºko irudiekin) eta familientzako joko interaktiboa eskaintzen du. “Misterioz beteriko mundu batean sartu eta intxixu eta besandreen laguntzaz meatzearen barruan ezkutatu duten Aiako Harriaren bihotza berreskuratzeko erronka izango dute ausartzen direnek”. Era honetan, bide berdea “modu ludiko eta dibertigarrian” zeharkatzeko aukera izango dute bisitariek.
Eskualdeko sustapen turistikoa bultzatzeko balioko duen euskarriak izatea espero dute, “gure ondare historiko eta kulturala balioan jarriz eta mugikortasun jasangarria sustatuz”.
