Erriola Gunea, izen berriarekin aukera zabalagoa betiko tokian
Orereta Ikastolaren gunea, beti bezala, Koldo Mitxelena plazan jarriko dute. Kilometroengatik, izaera berezia izango du aurten.
Orereta Ikastolaren komunitateak urteak daramatza Koldo Mitxelena plazan txosna jartzen. Nagusiki eskaintza gastronomikoa eman du, baina iaz «ariketa txiki bat» egin zutela gogorarazi du Mikel Leitzak, antolakuntzan dabilenetako batek. «Andoni Ollokiegi eta Asier Burgete oholtza txiki batera ekarri genituen, ikusteko nola funtzionatzen zuen, eta aurten zerbait zabalagoa eta handiagoa egiteko asmoarekin», esan du Leitzak. Aurten Kilometroak festa egitea «aproposa» izan dela zehaztu du, guneari «bultzada» emateko: eskaintza gastronomikoari kulturarena gehituko zaio. Berritasuna izango du, gainera: izena aldatuko diote. Erriola Gunea izango da aurrerantzean. «Kilometroak festa pasatuta, nolabaiteko arrastoa uztea nahi genuke».
Plaza berri bat sortu nahi zuten, eta egunero ekitaldiren bat egongo da. Leitzak aurreratu duenez, 01:30 inguruan itxiko dute gune berritua. «Orain arte funtzionatu duen hori mantendu nahi dugu: familiak, haurrak, helduak biltzen duen gunea izatea… arau batzuk errespetatzen», iragarri du.
Egitarauari errepasoa eman dio, kronologikoki: ikasleen ekitalditxoa, eta bertso musikatu saioa; Asier Burgete eta Bengoren emanaldiak; Ereinekin elkarlanean osatutako Erriola sutan ikuskizun piroteknikoa, eta DJ Ikerren pintxada; Andoni Ollokiegi, Kai Nakai eta Naizen elkartekoak; erraldoien topaketaren aitzakira antolatutako herri bazkaria eta Iñaki Labaka eta lagunak. «Ongi ateratzen bada, baloratu eta eskaintza errepikatuko dugu datozen urteetan».
Erriola Gunearen egitarau oso-osoa ikusteko, egin klik egin hemen (PDF artxiboa zabalduko da).
