Hibaikako emakumeen igoeraren argazki erakusketa, Keralan
Dani Novas argazkilariarenak dira erakusketako argazkiak, 17 denera, eta iraila arte ikusteko aukera izango da.
Hibaikako emakumeak aurtengo denboraldi honetako estropada baten ondoren. Argazkia: Dani Novas Hibaikako emakumeen gaineko argazki erakusketa zabalduko dute Zumardiko Kerala tabernan. Aurreko denboraldian, Euskotren Ligara jauzi egin zuten errenteriarrek, eta igoera horretakoak dira, hain zuzen ere, Keralak hartuko duen erakusketan ikusteko aukera izango direnak.
Irudi horien egilea, Dani Novas argazkilari errenteriarra da. Hibaika Arraun Elkarteko bi eskifaiekin batera eta bestera ibiltzen den argazkilarietako bat da Novas, eta irudi ederrak uzten ditu estropada bakoitzaren ondotik.
Igandean, hilaren 30ean, inauguratuko dute argazki erakusketa, 18:00etan. Kerala tabernan egingo duen erakusketa, 90 zentimetroko hamazazpi argazkiekin osatu du Novasek. Irailera arte izango da hura bisitatzeko aukera, Kontxako Bandera lehiatzen duten arte.
