[Bideoa eta argazkiak] Gazte Eguna, "Euskal Herri euskalduna" eskatzeko
930 gazte elkartu dira Gazte Eguneko bazkarian. Aurten, Azterketak Euskaraz mugimenduari emango diote jasotako dirua.
Gazte Eguna dute gaur Oiartzunen eta gazte andanak erantzun dio deiari. Biyurrieneak karrikak arrosez koloreztatzea lortu du, 930 pertsona elkartu baitira Kontzejupean egiten ari diren gazte bazkarian. Alta, beltzez jantzita, Alba Lozanoren Utländsk film laburra grabatzen aritu dira saltsaren erdian.
Bazkarian euskara topa deiturikoa egingo dute lehen aldiz Ttur-tturek bultzatuta. Gazteen artean eta herrian euskara sustatzeko keinua da, “bultzada hori jaietatik hasi nahi izan dute” azaldu dute Biyurrieneako kideek.
Bazkaria bukatuta, Xaukena elektrotxarangarekin buelta emango dute herritik, 18:30etatik aurrera. Gero, gaualdean, txosna gunean kuadrilen arteko jolasak egingo dituzte. Egitaraua, Dj Fresamorangok itxiko du.
Azterketak euskaraz
Urtero eragile bati laguntza ematen diote gaurko egunetik ateratako diruarekin, eta aurtengoan, Ipar Euskal Herriko Azterketak Euskaraz mugimenduari emango diote. Azken hauek bertan izan dira eta txupina bota dute.
Baxoa frantsesez egin behar izan dutela Etxepare Lizeoko 150 ikaslek salatu dute, “ez da bakarrik hizkuntza eskubideen urraketa bat, haien menpeko sentiarazi nahi gaituzte”.
Ipar Euskal Herriko ikasleek bakarrik ezingo dutela arazo honi aurre egin adierazi dute Azterketak Euskaraz-ekoek, “zuen ekimen honek, herriago egiten gaitu, alaiago sentiarazten gaitu, kuraia ematen digu aintzina egiteko, indartu egiten gaitu, eta haiek ahulagoak dira. Gora Oiartzungo gazteria! Gora Euskal Herri euskalduna!”
Segidan, bertso bat bota dute:
Oiartzun gogor erantzun
Aditu dut betidanik
Eta orain ezin erran
Hori horrela ez danik
Frantses Estatuan ere
Ez zaigu faltatzen lanik
Milesker Biyurrinea
Zure indarra emanik
Nahiz eta brebeta euskaraz
Posiblea den jadanik
Baxoa ere euskaraz
Galdetzen dugu oraindik
Baxoa ere euskaraz
galdetzen dugu oraindik
Baietz errezago lortu
zuek ondoan izanik.
