Islandian porturatuko da Albaola
Euskal Zentro bat zabalduko dute aurki Islandian, eta proiektura gonbidatu dute Albaola, "ontzigintzako euskal tradizioak partekatu eta alderatzeko".
Islandian dira dagoeneko Albaolako ordezkariak. Islandiako eta Euskal Herriko marinelen historia partekatua babesten duen Basque Association in Iceland elkarteak Euskal Zentro bat zabaltzeko asmoa du Islandian. Djupavík herrian egingo dute, Euskal Herritik Islandiara joaten ziren marinelekin lotura estua duen herri horretan hain zuzen. Esaterako, 1615ean zenbait euskal baleontzi hondartu ziren inguru horretan.
Bada, Albaola zentro horren sorreran parte hartzera gonbidatu dute, “Europako bi nazio txikiren historia, Euskal Herrikoa eta Islandiakoa, eta itsasoarekin duen lotura ospatzeko asmoz.”. Horrez gain, harreman berriak eraikitzeko, publiko berrietara iristeko eta euskal itsas historia balioan jartzen jarraitzeko asmoa ere badu proiektuak.
Balea txalupak eraikitzeko eta erabiltzeko Albaolak duen esperientzia eta ezagutza eskainiko dituzte Pasaiako ordezkariek. Hiru zeregin nagusi izango dituzte Albaolakoek. Lehenik, bi eguneko sinposioa antolatuko dute Albaola Faktorian (urriaren 16 eta 17an), partzuergoko bazkide, ontzigile tradizional eta historialariekin, “ontzigintzako euskal tradizioak partekatu eta alderatzeko”.
Bigarrenik, prestakuntza intentsibo bat antolatuko dute, Islandiako zenbait ontzigile tradizionalek bale txalupak eraikitzen ikas dezaten. Pasaian egingo dituzte saioak. Helburua, Islandiako arotzek Djupavík Euskal Zentro berrian euskal baleontzi bat eraikitzea da.
Azkenik, Albaolako zuzendari zientifiko Xabier Alberdik bale txalupa horren eraikuntzari lagunduko dion erakusketaren edukiak gainbegiratuko ditu eta itsas historia partekatuaren kapitulu garrantzitsu horren gaineko ezagutza historikoa partekatuko du.
Albaolako ordezkariak Islandian daude egunotan, Djupavík erakusketa gunea bisitatzen. Horrez gain, eman beharreko hurrengo urratsak ere zehaztuko dituzte.
