Olatz Mitxelena gonbidatuta hasiko da Irakurketa Taldearen ikasturte berria
Idazle oiartzuarraren 'Arrain hezur bat eztarrian' liburua aztertuko dute lehenengo saioan. Urte osoko programa iragarri dute.
Idazle oiartzuarrak bere lehenengo ipuin liburuari buruz arituko da irakurleekin. Oiartzungo Irakurketa Taldea prest da 2023-24 ikasturtea hasteko. Irailaren 19an izango da lehen saioa; ohi bezala, hileko hirugarren asteartean bilduko dira. Bibliotekako azken solairuan dute hitzordua, 20:00etan. Goiatz Labandibarrek dinamizatuko ditu saioak.
Gonbidatu batekin hasiko dute ikasturtea: Olatz Mitxelena Larreta. Arrain hezur bat eztarrian iruzkinduko dute Irakurketa Taldeko kideek, berarekin batera.
Taldearekin bat egin nahi duenak bibliotekan galde dezake.
Irakurketa Taldeak aurten irakurriko dituzten liburuen zerrenda zein izango den jakinarazi du. Askotariko genero eta estiloak izango dira. Guzti-guztiak, euskaraz.
Irakurketa Taldea 2023-24
- Iraila: Arrain hezur bat eztarrian (Olatz Mitxelena).
- Urria: Larrua (Curzio Malaparte).
- Azaroa: Kristalezko begi bat (Miren Agur Meabe).
- Abendua: Babilonia (Joan Mari Irigoien).
- Urtarrila: Erabili goldea hilen hezurren gainetik (Olga Tokarczuk).
- Otsaila: Iruleak (Garazi Albizua).
- Martxoa: Bihurguneko nasa (Uxue Apaolaza).
- Apirila: Dendaostekoak (Uxue Alberdi).
- Maiatza: Puta (Nelly Arcan).
- Ekaina: Haragizko mamuak (Karmele Mitxelena).
