Killirikupek ikasturtea aurkeztuko du irailaren 28an
2023-24 ikasturtean lau gai aztertuko dituztela aurreratu dute, feminismoan erreferente diren egileen lanak irakurriz.
Iazko ahalduntze eskolan ibili zen taldearen talde-argazkia (Arg.: Wikipedia). Killirikupe Emakumeak Ahalduntzeko Oiartzungo Eskolak 2023-24 ikasturtea aurkeztuko du irailaren 28an (osteguna da).
Manuel Lekuona bibliotekan emango dute aurtengo ikasturtearen nondik norakoen berri. 18:00etan hasiko da aurkezpen-ekitaldia.
Aurreratu dutenez, ostegunero elkartuko dira, urriaren 5ean hasi eta martxo bukaeraraino. Ordu eta erdiko iraupena izango du saio bakoitzak, 17:00etatik 18:30era.
Ohi bezala, feminista erreferentzialen testuak irakurriko dituzte ikasturtean zehar. Haietako batzuen berri eman dute: Ursula K. Le Guin, Silvia Federici, Maria Milagros Rivera Garretas…
Lau gai landuko dituzte Killirikuperen aurtengo ikasturtean. Honakoak izango dira:
- Zer egin zainketekin: amatasuna zainketa moduan eta etorkizunerako gida.
- Hizkuntza matxista eta alternatibak erabilera linguistikoa patriarkaletik aldentzeko.
- Osasunaren eta generoaren azterketa. Ikuspegi antropologikoaren eta feministaren abantailak.
- Zahartzaroa. Zein gazteri bururatzen zaio bere zahartzaroko irudia imajinatzea?
