Kiroldegiko gimnasioa berritu du udalak
Berrogei makina berri jartzeaz gain, lurzoru berezia eta paretak margotu dituzte ere. Orotara, 177.000 euroko inbertsioa egin dute.
Berriki, Oiartzungo Udalak Elorsoro kiroldegiko gihartze eta kardio gelak berritu ditu. Moldaketa nagusiak makina berriak eta lur berezia badira ere, aipatu geletako paretak margotu dituzte ere. Guztira, berrogei gailu berri jarri dituzte, gihartze gelan gehienak: hogei makina berriez gain, geltoki anitzeko bi eta pisu libreko ekipamendua jarri dituzte. Kardioa egiteko beste hamasei makina berri gehitu dituzte ondoko gelan.
Udalak 177.000 euroko inbertsioa egin du, eta honezkero erabilgarri dago gimnasio berria. Moldaketa lanak abuztuan zehar egin dituzte, ohiko jarduera “ahal bezain gutxien eragitearren”. Dena den, oraindik eta makina gehiago (ergometro nahiz mankuernak) helduko dira datozen asteotan. Udalaren arabera, geroz eta oiartzuar gehiago dira azpiegitura hauek erabiltzen dituztenak, bizimodu aktibo eta osasungarriaren seinale.
Gailu zaharrak, 39 orotara, herriko kirol taldeen artean banatu dituzte, haien entrenamenduetan erabil ditzaten.
