Marea beltza Hibaika babesteko
Hibaikako zaleek Marea beltza egingo dute igandean emakumeen eskifaia animatzera joateko Donostiara. Zita 08:30ean egin dute Herriko plazan.
Hibaikako emakumeak Kontxan ariko dira datozen bi igandeetan, asteakenean jokatutako sailkapen estropadan seigarren sailkatu eta txartel preziatua eskuratuta. Zaleek babesa erakutsi nahi diote Errenteria-Oreretako eskifaiari eta horri begira, marea beltza antolatu dute.
Herriko plazan jarri dute zita igandean, hilak 3, 08:30ean bertatik abiatu eta elkarrekin gerturatzeko Donostiaraino. Marea Beltzarekin bat egin nahi dutenek azaldu baino ez dute, denak elkarrekin Donostiara joateko Hibaikako emakumeak animatzera. Kontxako Banderaren lehen jardunaldia igandean 11:00etan hasita jokatuko dute emakumeek.
Igandeari begira girotzeko, bideoa ere zabaldu du Hibaikak. Negu Gorriak taldearen Radio Rahim kantaren erritmora jarri ditu dantzan senior taldeetako arraunlariak eta gonbidapen zuzena egin zaleei hitz joko eta guzti, Hibaika irratiaren uhinen erritmora, Kontxan murgil daitezen.
