Xorrola Gurutzeraino iritsiko da auzoko festetan
Larunbatetik iganderako gauean bost bidaia egingo ditu, orduero, gauerditik aurrera. Xanistebanetako arrakastak bultzatu du zerbitzua zabaltzea.
Jexux Olaziregi eta Olaia Lasa zinegotziak. Datorren asteburuan Gurutzeko festak ospatuko dituzte, eta udalak jakinarazi duenez, Xorrolaren gaueko zerbitzua egongo da larunbatetik igandera bitarteko gauean.
Gurutze gainontzeko zortzi auzoekin lotuko du autobus berdeak, 00:00etan hasita. Orduero aterako da; 04:00etan izango da azkena.
Iazko xanistebanetan jarri zuten martxan, estreinakoz, Xorrolaren gaueko zerbitzua. Bi helburu zituzten: mugikortasuna hobetzea eta autoen erabilera gutxitzea. Bi urte hauetan izandako “arrakasta” dela eta, gaueko zerbitzu hori egun berezietara luzatzea erabaki dute.
Gurutzen izango da lehenengo proba, “irisgarritasun arazo handienak” dituen auzoa delako, Olaia Lasa Gizarte-Ongizate zinegotziaren arabera.
Orduero aterako da autobusa, eta herriko plazako geltokian geratu ondoren, xanistebanetako ibilbidea egingo du. Honakoa izango da:
- Gurutze (irteera): Bizardia plazako autobus geltokia.
- Elizalde: biblioteka ondoko geltokia.
- Ergoien: Tornola kaleko autobus geltokia.
- Altzibar: Zokoloko zubia.
- Karrika: plazako autobus geltokia.
- Iturriotz: Beko soro pareko autobus geltokia.
- Ibarre: gasolindegiko geltokia.
- Elizalde: Pikabeneko geltokia.
- Ugaldetxo: Intxixu pareko autobus geltokia.
- Arragua: Lartzabal etxadiko geltokia.
- Mendin: frontoi gaineko geltokia.
Festetan, 270 erabiltzaile
Aurtengo xanistebanetako balorazio “oso positiboa” egin du Jexux Olaziregi Kultura zinegotziak. 270 erabiltzaile izan ditu aurten, iaz baino 77 gehiago.
“Jendearen ohiturak aldatzen hastea zen gure helburua, etxera itzultzerakoan autoa hartu beharrean Xorrolan joatea. Pozik gaude xanistebanetan geroz eta herritar gehiagoren aukera delako autobusa”, esan du Olaziregik.
Nabarmendu duenez, gauetan eguraldi kaskarra egin arren, iazkoarekin alderatuta, erabilera %40 igo da. Honakoa izan da erabiltzaile kopurua, xehatuta:
- Abuztuak 2: 38.
- Abuztuak 3: 60.
- Abuztuak 4: 42.
- Abuztuak 5: 97.
- Abuztuak 6: 33.
