Josetxo Etxandi Oroitaldia fase beroan sartu da
Atzo eta gaur federatuen kategoriako hainbat finalerdi Koldobike Gezala pilotalekuan. Federatuen finalak hilaren 14an jokatuko dituzte.
Aste honetan ari dira jokatzen Josetxo Etxandi Pilota Oroitaldiaren 47. ekitaldiko partidarik beroenak. Atzo, esaterako, Emakumeen Lehen Mailako afizionatuetako binakakoaren finalerdietako bat eta gizonen etorkizuneko izarren lau t’erdiko beste bat jokatu zituzten. Gaur, ordea, Gizonen Elite Mailako bikotetako txapelketaren bi finalerdiak jasoko ditu Koldobike Gezala pilotalekuak.
Atzokoan (hilak 4, astelehena), Emakumeen Lehen Mailako afizionatuetako bigarren finalerdian, Aldai-Oses bikoak 22-20 garaitu zituen Garai eta Capellan. Aldi berean, Emakume Master Cup txapelketarako baliagarria izan zen partida hori. Beraz, Santakrutz Egunean (hilaren 14an) finala jokatuko dute Aldaik eta Osesek, aurretik sailkatuta dauden Arrizabalaga eta Mendizabalen kontra.
Etorkizuneko Izarrak gizonen lau t’erdiko txapelketako bigarren finalerdian, atzo jokatutakoa aldi berean, Beñat Zubizarretak erraz gainditu zuen Beñat Apezetxea, 22-9. Horrela, Zubizarretak aurretik finalerako txartela eskuratu zuen Hormaetxe izango du aurrez aurre hilaren 14ko finalean.
Gaur, binakakoaren finalerdiak
Bestalde, gaur, gizonen Binakako Elite Mailako finalerdiak jasoko ditu Koldobike Gezalak 18:30ean hasita. Hala, lehen finalaurrekoan Julen Alberdi-Aitor Alduntzin bikoak Ander Muruak eta Beñat Garmendiak osatutakoari aurre egingo dio finalerako lehen txartelaren bila. Jarraian, bigarren finalerdia: Azketa-Lizeaga eta Canabal-Aldabe bikoteek neurtuko dituzte indarrak finalerako bigarren txartelaren bila.
Finalak
Josetxo Etxandi XLVII. Oroitaldiaren federatuen finalak hilaren 14ko arratsaldean jokatuko dituzte Koldobide Gezala pilotalekuan. Emakumeen Lehen Mailako afizionatuetako binakakoaren txapela, gizonen Etorkizuneko Izarrak lau t’erdikoarena, eta gizonen Elite Mailako binakakoarena izango dira jokoan. 17:30ean hasiko dira partidak.
Herri mailako txapelketan finalak, berriz, hilaren 16an (larunbata) izango dira, Goiko plazako Josetxo Etxandi pilotalekuan (eguraldi txarrarekin Koldobike Gezalan).
