Oarsoaldeko AEK-k euskara hurbilarazi nahi die ikasleei, "urrun iristeko"
Oiartzungo egoitza berriaren kanpoaldean aurkeztu dute 2023-24 ikasturtearen matrikulazio-kanpaina. Ikasleek "eskaintza egokia" izango dutela iragarri dute.
Oarsoaldeko AEK-ko irakasleak gaurko aurkezpenean, Oiartzungo Hizkuntza Normalizazioko zinegotzi eta teknikariarekin. Oarsoaldeko AEK-k gaur aurkeztu du 2023-24 ikasturteko eskaintza. Oiartzungo Landetxe eraikinaren kanpoaldean egin dute; izan ere, bertan du egoitza berria herriko euskaltegiak. Oiartzungo Udaleko ordezkariak izan dituzte lagun.
AEK-ren lau euskaltegi daude eskualdean: Oiartzungo Intxixu AEK; Lezoko Oroitzene AEK; Errenteria-Oreretako Xenpelar AEK; eta Pasaiako Txirrita AEK.
Ikasleek “eskaintza egokia” aurkituko dutela ziurtatu dute euskaltegietako ordezkariek. Eskaintza hori zerrendatu dute: euskalduntze-ikastaroak; mailak egiaztatzekoak; C2; autoikaskuntza; merkatarientzako eta gurasoentzako ikastaroak; langabetuentzako trinkoak; mintza-taldeak; Mintzalaguna egitasmoak; eskualdeko irakasleentzako formakuntza; C1 mailako azterketak prestatzeko eskolak ikastetxeetan…
Urtero bezala, gainera, matrikularen kostuari aurre egiteko diru-laguntzak izango dira nabarmendu dute, ikasleek asistentzia ona badute.
53 talde iaz
Pasa den ikasturtean 53 talde aritu ziren euskara ikasten edo hobetzen Oarsoaldeko lau euskaltegietan, 25 irakaslerekin. Horretaz gain, hainbat ikaslek autoikaskuntzaren bidea hartu zuten, eta udan bost talde trinko aritu dira HABEren urriko azterketak prestatzen.
Eskolaz kanpoko ekintzak ere batu behar zaizkie: euskaltegietako afariak, Mintzagun tailerrak, AEKren liburu eskaintza, Errigora… “Ikasleei ekintza erakargarriak eskainiko dizkiegu ikasturtea hasten denean”, iragarri dute.
Lau udalerrietako herritarrak euskara ikastera, dakitena hobetzera eta euskara erabiltzera gonbidatu dituzte.
Euskara hurbil, zu urrun heltzeko
AEK-k aurtengo matrikulazio-kanpainaren leloa aurkeztu du: Euskara hurbil, zu urrun heltzeko. “Izan ere”, azaldu dute, “ikasleen ondoan gaude, daukagun onena eskainiko diegu haiek euskara ikasteko eta euskarak zabalduko dizkien ateen bidez, urrun helduko dira”.
Euskara etxeko eta lagun arteko harremanetan erabiltzeko, lan-egoera hobetzeko, bilatzen ari diren euskara-maila ezagutzeko eta beste hainbat gauzetarako balio duela nabarmendu dute. “AEKn aukera ugari dituzue”, berretsi dute, eta “eskarmentu handiko” lantaldea zain dagoela adierazi.
Horrez gain, AEK-k aurtengo ikasturtean erronka duela gogorarazi dute: 23. Korrika. “Ezinbesteko hitzordu horretan ere, nola ez, buru-belarri murgilduko gara AEKkideok”.
Kontaktua eta iraileko bulego-ordutegia
- Xenpelar AEK euskaltegia (Errenteria-Orereta). Biteri kalea 30, 1. pisua. Telefono zenbakiak: 607 56 92 00 eta 943 34 02 33. Posta elektronikoa. Ordutegia: 09:00-13:00 eta 17:00-20:00.
- Intxixu AEK euskaltegia (Oiartzun). Aialde kalea 2, Fermiñene Etxea 1. Telefono zenbakiak: 607 53 42 63 eta 943 49 39 57. Posta elektronikoa. Ordutegia: 09:00-13:00 eta 17:00-20:00.
- Txirrita AEK euskaltegia (Pasaia). Zumalakarregi kalea 9. Telefono zenbakiak: 607 54 53 81 eta 943 52 55 45. Posta elektronikoa. Ordutegia: 09:00-13:00 eta 17:00-20:00.
- Oroitzene AEK euskaltegia (Lezo). Donibane kalea 12, atzealdea. Telefono zenbakiak: 607 59 88 71 eta 943 51 91 44. Posta elektronikoa. Ordutegia: 10:00-13:00 eta 16:00-19:00.
