Gaur hasiko dira Ugaldetxoko danborradaren entseguak
Auzoko festak hilaren 22tik 24ra ospatuko dituzte. Danborrada prestatzen hasiko dira, eta goitibehera txapelketan ere izena eman daiteke.
Haurrak danborradan, iazko festetan [Arg.: facebook/ugaldetxo.kulturtaldea]. Ugaldetxoko auzotarrek ia prest dituzte beraien festak, eta jada hasi dira motorrak berotzen. Gaur —hilak 7, osteguna— hasiko dira danborradaren entseguekin.
Kalexa plazan elkartuko dira —Intxixu jatetxearen atzealdekoan—, 18:00etan.
Goitibeherak
Danborrada prestatzen hasteaz gain, Ugaldetxoko festen berezitasun bati buruzko oharra eman dute: goitibeheren txapelketa.
Adrenalinaz betetako lasterketa horretan parte hartu nahi dutenek hilaren 22a baino lehen eman beharko dute izena. Horretarako 652 76 23 84 telefono zenbakira deitu beharko da, edo Intxixu jatetxetik pasatu, eta bertan adierazi.
14 urtetik gorakoek har dezakete parte, eta adingabeek tutore legalen baimena beharko dute.
Txapelketa hilaren 24an izango da, 17:00etan hasita. Ohiko lasterketa tokia izango da aurtengoan ere, Txipitoko malda, alegia.
