Igandean bukatuko da igerilekuetako udako denboraldia
Irailaren 11tik 24ra bitartean, Fanderiako instalazioa itxiko dute geldialdi teknikoaren barruan.
Udako ordutegia igandean bukatuko da. Errenteriako Udalak jakinarazi duenez Beraun eta Fanderiako igerilekuetako udako denboraldia hilaren 10ean, igandearekin, bukatuko da. Irailaren 11tik 24ra bitartean, bestalde, Fanderiako instalazioa itxiko dute geldialdi teknikoaren barruan, osasun araudia betez igerilekuko hodiak erabat hustu eta garbitzeko, legionelosia prebenitzeko eta iturgintzako eta igeltserotzako ohiko konponketak egiteko.
Hilaren 25ean Fanderiako gimnasioa eta jarduera gela zabalduko dituzte neguko ordutegiarekin: 07:00etatik 21:30era astelehenetik ostiralera, 09:00etatik 21:30era larunbatetan, eta eta 09:00etatik 14:30era igandetan. Igerilekua eta hidroterapia eremua itxita izango dira estalki berriaren lanak bukatu artean.
Galtzarabordako kiroldegiaren ordutegia, honakoa izango da: 06:30etik 22:00etara astelehenetik ostiralera; 08:00etatik 22:00etara larunbatetan, eta 08:00etatik 14:00etara igandetan. Igerileku eta fitness zentro zerbitzuak izango dira bertan. Irailaren 17tik aurrera arratsaldez ere zabalik izango da 16:00etatik 20:00etara, baita jai egunetan ere.
Izen emate eta ikastaroei buruzko kontsultak Galtzarabordako kiroldegiko harreran egin daitezke baita 943 44 96 90 telefono zenbakira deituz.
