[Argazkiak] Bertakoak, onak, eta goxoak
Produktu eta elikagai ekologikoen azoka jaso du Errenteria-Oreretako Gamon Zumardiak goizean zehar.
Gamon Zumardian tokiko produktu eta elikagai ekologikoen azoka egiten ari dira goizean zehar. Bero da giroa. Itzal preziatuaren bila dabiltza asko. Baina, zer gauza hoberik bertako produktu on eta goxoak erostea baino? Eta, erosten den horren gaineko azalpen zehatzak jasotzea ere, eskertzekoa da, ezta? Bada hori gertatzen ari da 14:00ak arte zabalik dauden dozenaka postuetan. Biolurren ekimenez jarri dituzte postuak ekoizleek, eta Errenteriako Udalaren laguntza izan du azokak, baita Behemendi eta Euskadiko Nekazaritza eta Elikadura Ekologikoaren Kontseiluarena ere.
Topagunean, barazkiak, ardi eta behi gazta, gozoak, ogia, eztia, marmeladak, olioa, arrautzak eta beste produktu batzuk erosteko aukera izan dute bertaratu direnek. Erosi bakarrik ez. Mahaietan zeuden horien gaineko azalpen zehatzak eman dituzte ekoizleek, zer, nola eta zergatik egiten duten azaldu diete hala nahi izan duten guztiei.
Antolatzaileen hitzetan, elikagai ekologikoen azokak erakusleiho aparta dira Euskal Herrian dagoen elikagai ekologikoen aniztasuna plazaratzeko. Horregatik, urtero herri ezberdinetara zabaltzen dute azoka. Aurten, Zigoitian, Zarautzen, Zumaian eta Donostian izan dira, eta Errenteria-Oreretakoaren ondoren, Algorta, Zerain, Mungia, Aretxabaleta, Eibar, Gasteiz, Durango, Leintz-Gatzaga eta Villabonara ere zabalduko dute.
Jarraian, postuen eta ekoizleen argazki sorta:
