[Argazkiak] Mediterraneoaldia Lezon
Piztu Lezoren ekimenez Gazte Eguna egiten ari dira gaur Lezon. Goizeko herri olinpiaden ondotik, herri bazkaria egin dute Saldise plazan.
Errenteria-Oreretan Atlantikaldia jaialdia egingo dute hilaren 14tik 17ra. Aldi berean, Lezoko santakrutzak hilaren 13tik 17ra dira. Mugakide duten herriko jaialdiaren kontrapuntu bezala-edo, Lezoko gazteek Mediterraneoaldia jaialdia ospatu dute gaur: Valentziako laranjen koloredun elastiko izerdituak soinean izan dituzte, paella bazkaldu dute, eta Ibiza ikurtzat zuen musika talde baten antzera abanikoak di-da astindu dituzte haize ufadatxoak sortzeko (gazteenentzat mezua: talde hori Locomia da). Tenperatura ere Iberiar penintsulako ekialdeko zonalde hartakoaren antzerakoa izan da. Txantxak aparte: gaur, Piztu Lezoren ekimenez, Gazte Eguna egiten ari dira Lezon. Santakrutzen atarirako hainbat jarduera landu ditu herriko eragileak, horietatik mamitsuena beharbada, gaurkoa.
Hasteko, goizean, herri olinpiaden finala jokatu dute talde hori, urdin eta berdeak. Biharko Kontxako bigarren egunean zer gertatu zain, aurrekari bat Lezon: talde berdea izan da garaile. Lau Katu txaranga arduratu da balizko pikeak lausotzeaz ondoren, haien atzetik zirela poteoa egin dutelako gazteek. Karlos Saldise plazako bazkariaren ondoren bingo musikatuaren txanda, eta gero, Elektrokela elektrotxarangarekin dezibelioek gora egingo dute herriko kaleetan. Mediterraneoaz ari garela: Bakailaoaren bidea izango al da elektrotxarangarekin herriko tabernetatik egingo dutena? Giro ona behintzat ez da faltako, baten batek esango lukeen bezala, lesokua.
Lezoko gazteak berriz ere elkartu dira. Demostratzen ari dira gai direla herriak berezko duen izaera indartu, eta euren erara berridazteko. Beti herrigintza ikuspegitik, beti Lezo aberasteko helburuz, beti herrian eta herritarrentzat, gazte edo heldu. Hori da Piztu Lezoren nahia sortu zenetik, eta horretan eragiten jarraitzeko konplize gehiago behar dituztela azaldu dute. Gaurko egunak balio dezala konplize horiek aurrera urratsa egin dezaten.
Piztu Lezoko kideek HITZAri esan diotenez, 350 gazte inguru izan dira bazkarira bildu direnak. Bazkal orduan izan da HITZA haiekin. Prestu azaldu dira gehienak argazkian ateratzeko. Sakelako telefonoen magiari esker, Suitzan zegoen lezoar bat ere aterako da irudi galerian. Jarraian, Mediterraneoaldia jaialdiaren lehen edizioko bazkarian izan direnen irudi horiek:
