[Argazkiak] Dena eman dute
Irabazi izan balute bezala ospatu dute Hibaikako arrunlariek. Seigarren sailkatu dira errenteriarrak.
Hibaikako emakumeak gaurko estropada amaituta, dantzan. Ikaragarria izan da giroa. Kolorez bete Donostiako portu ingurua, eta aurreko Kontxako jardunaldiarekin alderatuta askoz ere jende gehiago ibili da gaur arraunlariak animatzen. Euriarekin esnatu da igandea, baina gogotik berotu du eguzkiak. Eguraldia bikain, eta bikaina ere Kontxaren testuinguruan sortu den giroa.
Irabazi izan balute bezala ospatu dute Hibaikako arraunlariek. Seigarren sailkatu dira errenteriarrak; ez dute aurreko asteburuan bezala Hondarribia garaitzerik lortu eta bi segundo pasatxoko aurreko asteko errenta ez da nahikoa izan Hibaikako eskifaiakoek bosgarren postu horri eusteko. Hondarribiak hiru segundo atera dizkio gaurko estropadan Hibaikari. Gogotik aritu dira errenteriarrak bosgarren postu hori mantendu nahian batez ere itzuleran. Borroka estua ikusi da aquarium paretik aurrera lehenengo txandan aritu diren ontzien artean. Bosgarren postu hori lortzetik segundo exkaxera gelditu dira Hibaikako emakumeak.
Aurreko igandean Zuriñe Alberdi patroiak, gora egindako koska hori mantentzen saiatuko zirela esan zuen gaurko jardunaldian, baina batez ere, gozatzera aterako zirela uretara. Hala egin dute. Gogor lehiatu dira, dena emanda, eta gozatu ere egin dute. Natalia Tubio aritu da gaur patroi lanetan eta balorazio ezin hobea egin du estropadaren gainean. “Asko gustatu zaigu gaurko estropada, egia da Kontxako azken jardunaldia izanik eta lehen luzean gure burua atzean ikusita, presatsuki aritu garela. Erlaxatu gara, eta oso pozik gaude “.
Pozik emaitzarekin. Zalantzarik ez zegoen gogotik ospatu dutelako Kontxan egin duten ibilbidea kantu eta dantza artean dianaren doinuekin.
Gaur ere ez du aukerarik izan Hibaikaren eskifaiak ontzia portuko arrapalatik ateratzeko, baina zaleekin, bi igande hauetan zein denboraldiko gainontzeko estropadetan hutsik egin ez duen marea beltzarekin esker ona azaldu izan nahi dute errenteriarrek. Ontzitik atera gabe, arrapalaraino hurbildu dira taldekide guztiak Madalen ontzian zirela eta zutik eskerrak eman dizkiete bertaratutakoei. Arrapalan marea beltza, pankarta eta bandera erraldoiarekin herrikideen esfortzua eta lorpena txalotzen. Une ederra izan da, arraunlarientzat, baita zaleentzat ere; elkarri aitortza. Ez da hor amaitu, gaur ere, Donostiara gerturatu diren zale guztiekin familia argazkia egin dute Hibaikakoek txalo artean behin ontzia atera dutenean, aurretik besarkada eta muxuak banatu, eta dantza saioa eginda ere.
Kontxaren sailkapena
1- Arraun Lagunak- 21:01.4
2-Donostiarra- 21:10.50
3- Orio- 21:19.22
4-Tolosaldea- 21:22.14
5-Hondarribia- 21:54.80
6-Hibaika: 21:55.88
7-Zumaia- 22:07.10
8- Kaiku-22:15:16
