17.053 erabiltzaile izan ditu Oiartzungo udako igerilekuak
Iaz baino 2.592 lagun gutxiago joan dira udako igerilekura, eguraldi aldakorra dela eta. Uztaila izan da hilabeterik jendetsua.
Irailean bisitarien kopuruak gora egin du. Pasa den igandean bukatu zen udako igerilekuko denboraldia. Hiru hilabete egon da irekita, eta erabiltzaile kopuruaren balantzea egin du Oiartzungo Udalak.
Jakinarazi dutenez, 17.053 pertsona joan ziren bertara, ekainaren 10etik irailaren 10era bitartean. Iaz baino 2.592 lagun gutxiago dira. Izan ere, udako eguraldi “aldrebesari” egozten dio udalak jaitsiera hori.
Uztaila erabiltzaile gehien izan dituen hilabetea izan da, baina, hala ere, iazkoarekin alderatuta, asko jaitsi da kopurua: 3.346 igerileku zale gutxiago joan ziren.
Irailean, baina, eman zaio buelta tendentzia kaskarrari. Pasa den asteko bero-saparen ondorioz, 2022an baino 1.105 lagun gehiago hurbildu ziren bertara.
Erabiltzaile kopurua
- Ekaina: 3.165 (2022an baino 17 gutxiago).
- Uztaila: 5.917 (3.346 gutxiago).
- Abuztua: 5.142 (334 gutxiago).
- Iraila: 2.829 (1.105 gehiago).
