Arraztalo hamalaugarren urtez egongo da plazan
Kontsumo taldearen produktuak eskura daitezke astelehenero; kide izateko deia egin dute. Beste bost ekoizle ere izaten dira bertan.
Astelehenero bertako produktuak enkargatu edota jaso daitezke. Arraztalo Kontsumo Taldea orain dela 14 urte hasi zen astelehenetan azoka egiten. Baratzeak ematen duena jasotzen dute kontsumo taldeko partaideek, astelehenero.
18:00etatik 19:00etara izaten dira Done Eztebe plazan. Lehen Killirikupen jartzen ziren, eta orain udaletxeko arkupean.
Aurten ere hasi dira horrekin, eta taldean parte hartzera animatu dute, e-posta bidez idatzita edo 617 58 57 24 telefono zenbakira deituta. Hilean 55 euro ordaindu behar dira produktuak jasotzeok.
Arraztalorekin batera, beste bost ekoizle izaten dira astero, HemenGuk-en barrukoak: Zituene pasta; Gezamina ogia; Peluzar arrautzak; Larremotx gazta eta Arabolaza eztia.
Jakinarazi dutenez, ekoizle gehienek zuzenean eskaerak hartuta lan egiten dute. Aurreko astean eskatu eta hurrengorako produktuak ekartzen dituzte. Bertaratu eta eskaerarik gabe erosi nahi dutenentzat ere izaten da nahikoa produktu, azaldu dutenez.
