Hemen dira santakrutzak
19:00etan alkate txikien ardura izango da Lezoko festak abiatzea. Hortik aurrera, igandera arte, 59 ekitaldi.
Gaurko 19:00ak iristearekin batera hasiko dira 2023ko Santakrutz Festak. Osotara 59 ekitaldi bilduko dituzte iraileko festek igandera arte. Alkate txikien kargu geratuko da hasiera hori, Murixkako dantzariren Agurra-ri eta Lezoko herria ereserkiari bide emanez. Lasai, meteorologia iragarpenek diote ez duela euririk egingo. Baina auskalo.
Egunari so eginez, danborradena izango da nagusitasuna egitarauan. 22:45ean abiatuko dira horren mami diren lau elkarteen burrunbak (Ixkulin, Altzate, Tiñelu eta Allerru), eta den-denek bat egingo dute 23:45ak aldera Gurutze Santuaren plazan. Argazki ederra utziko dute han, alaitasuna ardatz. Eguna ixteko, edo hobe sanda, i-14 egunari harrera egiteko, Laiotz taldearekin erromeria izango da Karlos Saldise plazan (01:30).
Biharkoa festen egun handia da, Santakrutz Eguna. Arrantzaleen eta Tartekoen bazkaria izango da egunaren erdigunea. 800 festazale espero dira. Baina bihar, biharkoak.
Hilak 13, asteazkena (gaur)
- 19:00. Alkate txikien pregoia eta txupinazoa Gurutze Santuaren plazan. Ondoren Musika Eskolako bandak eta Munttar txistulari taldeak Lezoko herria ereserkia joko dute. Horren ostean, erraldoi eta buruhandien kalejira.
- 19:30ean. Santo Kristo elizan, Gurutze Santuaren bezperak.
- 22:45. Allerru, Altzate, Ixkulin eta Tiñelu elkarteetako danborraden irteera.
- 23:45. Danborraden topaketa Gurutze Santuaren plazan.
- 01:30. Erromeria Laiotz taldearekin Karlos Saldise plazan.
Hilak 14, osteguna (bihar)
- 10:00. Diana Munttar Txistulari Taldearekin.
- 10:00-13:00. Gurpilen gaineko zirkuitua haurrentzat Saldise plazan.
- 11:00. Meza Nagusia Santo Kristo elizan.
- 12:00. Herri kirolak Gurutze Santuaren plazan. Aizkolariak: Iker Vicente, Eneko Saralegi, Julen Alberdi eta Ugaitz Mugerza. Harri jasotzailea: Mikel Mugerza.
- 12:00. Erraldoi eta buruhandiak.
- 12:30. ‘i-14’ eguneko topaketa Kale Nagusian, Txirbilla Sound Systemekin.
- 14:00. Erretiratuen bazkaria Etxeberri jatetxean.
- 14:30. ‘i-14’ egunaren txupinazoa Gurutze Santuaren plazan.
- 15:00. Arrantzaleen eta Tartekoen bazkaria Herri Eskolako jolastokian.
- 17:00. Haurrentzako puzgarriak Goiko plazan.
- 17:30. Josetxo Etxandi XLVII. Oroitaldiko federatuen finalak Koldobide Gezala pilotalekuan.
- 18:00. Erraldoi eta buruhandiak.
- 18:30. Herri Eskolako jolastokitik hasita, Jaixkipe txarangarekin kalejira.
- 20:30- Karlos Saldise plazan, DJ Bull.
- 22:00. Zezen suzkoa Gurutze Santuaren plazan.
