Pasaiako emakumeak, elkarren sostengu
Martxan da Pasaiako Jabetze Eskolaren ikasturte berria, eta zabalik izen-ematea. Eskolaren aterkipeko abaguneak goraipatu dituzte parte-hartzaileek: «Emakumeen artean konplizitate berezia dago».
Ezker-eskuin, Kristina Osa eta Patricia Rodiño. 
Hamarkada beteko du aurten Pasaiako Jabekuntza Eskolaren eskaintzak. Aste honetan zabaldu dute bertako ikastaro, tailer eta bestelako jardueretan izena emateko epea, eta hala mantenduko da hilaren 26ra bitarte.
Ehunka emakume pasaitar, askotariko adin, hizkuntza, zaletasun eta jatorrikoak igaro dira azken hamarkadan ahalduntze espaziotik. Horietako bi dira Kristina Osa antxotarra eta Patricia Rodiño trintxerpetarra. Biek Emakumeak korrikalari taldean parte hartu zuten joan den ikasturtean, eta Osak baita pala taldean ere.
Rodiño ez da jada Pasaian bizi, eta beraz, elkarrizketa egiteko unean Osak eramandako Jabetze Eskolaren (JE) eskuorria ez zuen jaso —Pasaiako postontzietan banatu dute azken asteotan, baina beste herrietako emakumeek ere eman dezakete izena—. Jakin-mina zuen aurtengo eskaintza ezagutzeko, eta antxotarrak bere liburuxka oparitu zion.
Lehen aldiz eman zuten izena biek iaz JEn. «Beti gordetzen nuen eskuorria eta, joan den urtean, azkenean, animatu nintzen», azaldu du Antxokoak, «baina argi nuen taldean egin nahi nuela zerbait. Korrika egitera irteteko motibazioa nuen, baina ez nuen bakarrik joan nahi».
Taldearen sostengua
Bi korrikalariek sostengu sentitu dute taldea azken urtean. Bakarrik izan balitz, korrika egingo ez luketela aitortu dute, baina horretarako abagune ezin aproposagoa topatu zuten JEren aterkipean. «Emakumeen artean konplizitate berezia dago», Osak, «beste energia mota bat. Leku seguru batean zaudela sentitzen duzu. Aske adierazteko aukera duzula, hitzez nahiz gorputzaren bidez».
«Euren garaian», gazte zirenean, emakume talderik ez zela deitoratu dute, emakumeak, asko jota, josteko elkartzen zirela eremu publikoan. Pentsaezina zen kirolerako bat egitea. «Eta ez da aitzakia, beti egon izan baitira emakume kirolariak eta arau guztiekin apurtu dutenak, baina egia da gizarteak berak ez zizula laguntzen bide horretan aurrera egiten».
Eskaintzaren doakotasuna goraipatu dute. Rodiño: «Halako jarduerak errutinatik ihes egiteko leihotxo bat dira. Denok merezi ditugu, eta ordainpekoak badira, ez daude denon eskura».
Izen ematea eta informazioa, hemen klik eginda.
