Ikasturte berriko Eskola Feministaren programa aurkeztu dute gaur
Ikastaroak urritik maiatzera izango dira, eta bihartik aurrera eman ahal izango da izena.
Cuesta eta Cruz, aurkezpenean. Amaia Cuesta berdintasun teknikariak eta Itsaso Cruz berdintasun zinegotziak 2023-24 ikasturteko Eskola Feministaren programa aurkeztu dute gaur goizean. Emakumeen Etxean izan da aurkezpena, eta guztira bost ikastaro, sei tailer eta hiru jabekuntza talde antolatu dituztela aurreratu dute. Urrian hasi eta maiatzera artean burutuko dira hauek, eta izen ematea bihartik urriko lehen astelehenera arte izango da.
Cruzek iazko datu positiboak azpimarratuz hasi du aurkezpena: “Iaz 263 emakumek lortu zuten plaza, nahiz eta izen ematea altuagoa izan zen, eta guztira 21 jarduera antolatu ziren udazkeneko eta udaberriko eskaintzaren barruan. Aspalditik harrera ona izan duten espazioak izan dira, eta aurten aldaketa batzuk egon diren arren, ondo funtzionatu duten hainbat ere mantendu dira”. Gaur arratsaldeko seietan izango da programaren aurkezpena, eta ikastaroak emango dituzten irakasle batzuk egongo dira bertan, besteak beste. Jarraian, 18:30ean, Bea Egizabalen eskutik Magma Mia! bakarrizketa ikusteko aukera izango da Emakumeen Etxean.
Cruzek Emakumeen arteko kantua berreskuratzen ikastaroa azpimarratu du berrikuntzen artean, eta Castrok, horren harira, azaldu du ikastaro horren saio pilotu bat egin zutela eta “arrakasta handia” izan zuela: “20 emakume inguru hurbildu zirenez aurrera jarraitzea erabaki genuen. Ez da abesbatza edo ondo abesteko espazio bat izango, denon artean eta abestien bidez gai batzuk lantzeko, baizik”.
Hori ez da, ordea, aurtengo programazioan egin duten berrikuntza bakarra. Xilografia eta mendi orientazioa ikastaroen kasuetan baitator beste berrikuntza bat: ikastaroak euskaraz badira ere, belarriprest izateko aukera ere eskainiko dute. “Irakasleak bide berri hau esperimentatzeko prest zeuden eta iruditzen zaigu horrela gehiago zabaltzen dela aukera”, dio Cruzek.
Gazteak erakartzea, aurtengo erronka
Cuestak eta Cruzek adierazi dutenaren arabera, halere, emakume gazteak ikastaroetara inguratzea da haien erronka nagusietako bat, eta horiek erakartze aldera hiru tailerretan gazteen plazak lehenetsiko dituzte. Gure genealogia feministak, Autodefentsa feminista eta Boterea, ahizpatasuna, perreoa dira tailer horiek.
Programaren nondik norakoak udalak argitaratu ditu dagoeneko, hemen.
