Pasaiako Udal Euskaltegian izena emateko azken egunak direla gogorarazi dute
Hainbat taldetan plaza libreak geratzen direla nabarmendu dute. Ordutegi zabala dutelagogorarazi dute, eta diru-laguntzak daudela.
Pasaiako Udal Euskaltegiko sarrera. Pasaiako Udal Euskaltegiak gogorarazi duenez, 2023-24 ikasturterako izena emateko azkeneko egunak dira.
A1etik C1era bitarteko mailak eskaintzen dituztela nabarmendu dute, ordutegi zabalean (07:00etatik 21:00etar).
Hainbat taldetan plaza batzuk geratzen direla jakinarazi dute, baita txandaka lan egiten dutenentzat ere. Gainera, autoikaskuntzan inoiz baino toki gehiago daudela adierazi dute, eta oraindik bertan ere izena eman daitekeela.
“Modulu guztiak egokituta daude euskara ikasten hasi, ziurtagiriren bat egiaztatu (HABE, IRALE, IVAP…) edo maila hobetu nahi duten ikasleek horretarako aukera izan dezaten”, esan dute euskaltegiko arduradunek.
Ohiko eskolez gain, bestelako jarduerak ere egiten dituzte, “ikasleak motibatu” eta euskara “ingurune errealean” praktikatzeko: tailerrak, hitzaldiak, txangoak, mintzalaguna…
Diru-laguntzak
Matrikula ordaintzeko diru-laguntza ugari dituztela jakinarazi dute, eta bat bereziki azpimarratu nahi dute aurten: HABEk abian jarri duen C1 helburu duten 16-18 urte bitarteko ikasleena.
Gazte horien urte osoko matrikula 20 eurokoa izango da, baldin eta baldintza batzuk betetzen badituzte.
Iragarri dutenez, talde gehienetan eskolak datorren astean hasiko dira eta gainerakoetan urriaren hasieran.
Informazio gehiago behar duenak 943 00 43 40 telefono zenbakira dei dezake, edo euskaltegira bertara hurbildu (Euskadi etorbidea 61, Trintxerpe; anbulatoriora igotzeko igogailuaren ondoan dago).
