Beraungo udal pilotalekuaren ondoko aparkalekua, zabalik
Aparkaleku publikoan 63 plaza egin dituzte, eta jendearentzat zabalik dago dagoeneko.
Beraungo udal pilotalekuaren ondoko aparkaleku berria. Beraun kalea berrurbanizatzeko proiektuaren baitan sortu dute aparkaleku publiko berria. 63 plaza ditu honek, eta jendearentzat erabilgarri dago jada.
Udalak adierazi du aparkaleku horri esker Beraun kaleko 5. eta 15. zenbakien arteko plaza berrien obrak egin ahal izango dituztela, eta, ondorioz, atarien aurreko eremuetan aisialdirako lekua irabaziko dela. Hala ere, aurreratu dute “laster” aparkaleku horri kale horretan eraikitzen ari diren aparkaleku eraikina gehituko zaiola.
Aldi berean, 5. eta 15. zenbakien aurrealdeko plazak urbanizatzeko lizitazio prozesua jarri du abian udalak, eta horren bidez 1.700 metro karratu inguru irabaziko dira pertsonentzako. “Bertan gune berdeak egoteaz gain, haur jolasak eta egonlekuak ere egongo dira”. Esku hartzeak hiri eremua eta berdeguneen, pasealekuaren eta plazen irisgarritasuna “hobetzea” aurreikusten ditu, besteak beste.
Proiektuaren fase honen aurrekontua 889.341,04 eurokoa da, eta barne hartzen ditu dagoeneko ireki den aparkalekua eta “laster” birgaituko dituzten plazak.
