Kenpo kai txapelketara, esku hutsik ez etortzeko asmoz
Hurrengo asteburuan jokatuko dute, Tunisian, Munduko Kenpo Kai Txapelketa. Honbu elkarteko ordezkaririk ez da faltako; bertan izango dira Alain Isasa beteranoa eta Uxue Arozena debutaria.
Uxue Arozena eta Alain Isasa Elorsoroko tatamian, ‘kenpo kai’ jartzen duen kartelaren azpian. Estreinakoz, Munduko Kenpo Kai Txapelketa Japoniatik kanpo egingo dute. Tunisiako Hammamet hirian izango da, hurrengo asteburuan, eta ez da oiartzuarrik faltako.
Alain Isasa eta Uxue Arozena borrokalariak bertan izango dira, eta Mikel Artolak epaile-lanak egingo ditu.
Eskarmentu handia du Isasak munduko txapelketetan; izan ere, behin baino gehiagotan estali du burua txapelarekin. Txapelketako modalitate guztietan parte hartuko du: borrokaldian, taldekako borrokaldian, katan eta defentsa pertsonalean.
Aurten motibazio berezia izango du bakarkako katarekin. «18 urtetik gorako gizonen kategorian egingo den lehen aldia izango baita. Ez dakit zergatik ez den egin adin horretatik aurrera, baina aurten egongo da».
Kata bat zer den azaldu du munduko txapeldun behin baino gehiagotan izan denak: «Tatami erdira ateratzen zara, eta aurretik zehaztuta dagoen mugimendu-sorta bat egin behar da, ahal den finena, estetikoena… Koreografia antzeko bat da, kanpotik ikusita. Baloratzen dira egonkortasuna, indarra, kontzentrazioa… Horrelako ezaugarriak. Borroka bat da erakargarriena ikusleentzako, baina askoz zailagoa da kata bat ongi ateratzea».
Gainontzekoetan «ahal den onena» ematera aterako dela aurreratu du.
Uxue Arozena debutaria da mundu mailako txapelketa batean. 15 urte beteko ditu aurten, eta hark ere ahal duena egitera joango dela ziurtatu du. Azaldu duenez, gogoko duen probaren hutsunea sentituko du Tunisian: armekin egiten den kata. Oraingoz urduri dagoen arren, «ongi» sentitzen dela aitortu du, Afrikako herrialdera joateko gogoz.
Uda, prestakuntzan etena
Ezohikoa da txapelketa udaren ondoren jokatzea. Aurten ohi baino geroago eten dituzte entrenamenduak —uztailean— eta abuztuan atseden hartu dute.
«Irailean», esan du Isasak, «azkeneko ukituak ematen ari gara. Berriro sasoia berreskuratzen ari gara». Gaineratu duenez, «poliki» ari dira horretan, lesiorik ez jasateko. Erritmo motelagoan aritzeak alde ona ere baduela esan du Isasak: arerioak ere antzeko dabiltzala.
Kenpo kai borroka artea ez da kirol mediatikoa, eta, horregatik, kontrarioak nola dabiltzan «fitxatzea» oso zaila dela ziurtatu du Isasak. «Facebook-etik irits zaitezke Japoniako maisu batengana, eta haren bidez bideoren bat edo beste ikusi… baina ezer gutxi».
Bere kasuan, gainera, arerioetako asko lehenagotik ezagutu eta lagun ditu. «Zaila da lagun bati indar guztiarekin jotzea. Hori kanpoan uzten jakin behar da», berretsi du.
Arozenarentzat «guztia» berria izango da, eta hark ez du aurrean izan ditzakeen arerioen arrastorik ere. «Hori abantaila da, denarekin joan baitzaitezke», animatu dio Isasa beteranoak. Egonaldiari dagokionez, Isasak esan du txapelketaren aurretik kontzentratuta egongo dela gelan, paseorako tarteren bat hartuta. Arozenak oraindik ez daki zer egingo duen. «Nahikoa daukat ikastolako karpeta eta gainontzekoak prestatzen…», esan du.
Pandemiaren arrastoa Honbun
Honbuko kide gehiago Hammametera joatekoak ziren, baina data txarrak direla eta, ezin izan dute Euskal Selekzioaren espedizioaren parte izan.
Honbu elkartea sasoiko ote dagoen galdetuta, «pandemiari buelta ematen» ari direla aitortu du Isasak. «Dedikazioa elkarteari eskainia genion batzuk lanean hasi behar izan genuen».
Irakasle gabezia dutela onartu du, eta ikasle batzuk ari direla gazte berriak trebatzen. «Toki askotatik ari zaizkigu deitzen, ea norbait joan daitekeen hona edo hara, baina ikasleek ez dute —adibidez— Adunara joateko gaitasunik».
Hori bai, jendea animatu dute, kirola proba dezaten, ez delako dirudiena bezain «basatia». Arozenak beste arrazoi bat eman du: «Giro ona dugu, ez beste kirol batzuetan bezala…».
