Asteartean izango da udalbatzaren ohiko osoko bilkura
18:30ean izango da saioa, eta bost gai nagusi jorratuko dituzte. Streaming bidez saioa jarraitzeko aukera egongo da.
Errenteriako udalak osoko bilkura datorren asteartean, hilak 26, izango dela jakinarazi du. 18:30ean izango da hitzordua, baina “publikotasuna bermatzeko” saioa streaming bidez jarraitzeko aukera izango da lotura honetan.
Adierazi dutenaren arabera, bost puntu nagusi landuko dituzte: Jose Alberto Muñagorri Berdasco zinegotziaren izendapena eta kargu hartzea, 2023ko uztailaren 18ko zein irailaren 5eko bilkurari dagozkien aktak irakurri eta onartzea, alkatetzaren, zinegotzi ordezkarien eta tokiko gobernu batzordeen ebazpenen berri ematea eta gobernu taldeko eta dedikazioa duten oposizioko zinegotziei buruzko uztailaren 26ko 1948 Alkatetza Dekretuaren berri ematea, besteak beste.
Horietaz gain, ondorengo proposamen honen inguruan ere mintzatuko dira: Gipuzkoako Garraioaren Lurralde Agintaritzaren barruan dauden Gipuzkoako administrazioen eremuan bidaiarien errepide bidezko garraio zerbitzu publiko erregularrak harmonizatzeko araudiaren aldaketa puntualaren hasierako onarpena.
Puntu guztiak jorratu ostean, galderei edo eskariei erantzuteko tartea utziko dute.