Aitor Zelaia eta Galder Barbadori elkartasuna adierazi diete
Gazte arabarrek espetxeratzeko agindua jaso dute. Elkarretaratzea egin dute Oiartzunen, eta argazkia atera Antxon.
Elkarretaratzea plazan egin zuten, atzo arratsean. Aitor Zelaia eta Galder Barbado gazte arabarrek Espainiako Auzitegi Nazionalaren espetxeratzeko agindua jaso zuten pasa den astean.
Euskal Herri osoan mobilizazioak egin zituzten atzoko egunean. Goizean, Espainiako Gobernuak Bilbon duen ordezkaritzan eta Gasteizko Ertzaintzaren polizia-etxe batean kateatu ziren hainbat gazte. Euskal Herriko beste hainbat txokotan ere izan ziren protesta-ekintzak.
Oarsoaldean ere egin dituzte protestak. Ostegun arratsean Errenteria-Oreretan elkarretaratzea egin zuten.
Atzo, berriz, Oiartzunen eta Pasaian izan ziren protesta ekitaldiak. Antxon, San Fermin Txiki festen hasierako txupinazoaren ondoren, Zelaia eta Barbadori elkartasuna adierazteko argazkia atera zuten [albistearen bukaeran dago].
Oiartzunen, berriz, elkarretaratzea antolatu zuten. Hamarnaka lagun elkartu ziren Done Eztebe plazan, Aitor eta Galder aske. Euskal Herriak aurrera! Ankerkeriari Stop! lelopean.
Gogorarazi dutenez, gaur zortzi —hilak 30, larunbata— manifestazioa egingo dute Gasteizen. Mobilizazio nagusia izango da; 18:30ean aterako da Artiumetik.
Launa urteko kartzela-zigorra ezarri zieten bi gazteei, lehergailuak izatea egotzita. “Militante politiko” izateagatik zigortu nahi dituztela salatu zuten gazteek, BERRIAri emandako elkarrizketa batean.
