Badiako kutsadura azaleratuko du Buceo Donostik igandean
Itsas-hondoaren garbiketa egingo dute Pasaiako uretan. Bertan bildutakoarekin hondakinen erakusketa antolatuko du udalak gero.
Iraitz Pazos, Ingurumen zinegotzia, eta Mari Paz Lopez, Buceo Donostiko arduraduna. 
Datorren igandean, urriak 1, Buceo Donosti taldeak itsas hondoko zaborra jasotzeko jardunaldia egingo du Pasaian. Iniziatibarekin bat egin du Pasaiako Udalak, eta hala, Ingurumen Sailarekin lankidetzan, jasotako hondakinen erakusketa antolatuko dute.
Jardueraren helburua, antolatzaileek adierazi dutenez, “gizakiok gure jarrera arduragabearen ondorioz ozeanoei eragiten diegun kaltea azaleratzea” da. Hori begien bistako bihurtzeko erakusketa izango da Bizkaia plazan, igandetik igandera —urriaren 1etik 8ra—. Udala arduratuko da jasotako hondakinak dagokion sailkatze-gunera eramateaz gero.
Inguru honetan jaso ohi diren hondakinen artean ohikoenak dira plastikozko poltsak, botilak, mota guztietako latak, toallitak, aulkiak, edota pilak. Antolatzaileen arabera, igande honetan jasoko dutena egunero hondoetan aurkitzen dutenaren “lagin txikia” besterik ez da izango. Ongi ikasia dute hori: “Zoritxarrez, garbiketa hauek gure urperatzeen parte bilakatu dira, urpekarien komunitatearen barruan itsas-hondoak garbi mantentzeko kontzientziazioa oso handia baita”.
