[Bideoa] Mintzalagun bueltan da, berritasunekin
Gaur goizean aurkeztu dute ikasturtea. Haur txikiak dituzten familiei egokitutako Gurasolagun taldeak ere osatuko dituzte aurten.
Goizeko prentsaurrekoko argazkia. Ezker-eskuin: Cuadrado, Gorostidi, Azparren eta Re. 
Gaur goizean prentsa agerraldia egin dute 2023-24 ikasturteko Mintzalagun egitasmoa aurkezteko Laura Re Euskara zinegotziak, Patxi Azparren egitasmoaren dinamizatzaileak, Kontsuelo Gorostidi udal euskaltegiko kideak, eta Antton Cuadrado Euskara teknikariak.
Euskal Herriko herri askotan, aspalditik, Mintzalagun, Berbalagun, edo Berriketan izena duten programak garatzen ari dira. Iniziatiba horietan euskara hobetu nahi duten pertsonei doako zerbitzua ematen zaie, astero gidari baten laguntzaz euskara praktika dezaten.
Re zinegotziak aitortu du “alde handia” dagoela pasaitarren euskara ezagutza mailaren eta kale erabileraren artean. Geroz eta pasaitar gehiagok dakite euskara, baina denek ez dute erabiltzeko aukera handirik haien inguruan. Hori errazteko ahaleginean, Mintzalagun egitasmoa berriro abian jarri zen aurreko ikasturtean, eta honetan ere aurrera egingo du saiakerak Pasaiako Udalak eta udalerriko bi euskaltegiek (Udal euskaltegia eta Txirrita AEK) bultzatuta.
Kontsuelo Gorostidik joan den ikasturteko datuen errepasoa egin du: 63 lagun aritu ziren 15 taldetan, Pasaiako lau barrutietan. Horrez gain, antolatutako 8 ekintzetan 100 lagun baino gehiagok parte hartu zuten, eta beste 4 kanpo ekintzetan ere euskaltegiko ikasleekin batera 30 bat bidelagun eta bidelari ibili ziren.
Matrikulazioa
“Pozik gaude egindako lanarekin”, mintzatu da Gorostidi, “baita lanean jarraitzeko gogoz ere”. Mintzalagun egitasmoa herritar guztiei irekia dagoen eskaintza da. Matrikula epea euskaltegietako matrikula kanpainak baldintzatzen duen arren, eskaintza ez da euskaltegietako ikasleentzako bakarrik, edonorentzako baizik.
2023-24ko jarduna urritik ekainera bitarte izango da. Egitasmoa doakoa da, eta matrikula egin daiteke jada. Taldeak astean behin elkartuko dira; gutxienez, ordubetez. Mintzalagunek dinamizatzailearekin harreman iraunkorra izango dute, laguntza jasotzeko, ideiak jasotzeko, solasaldietako gaiak proposatzeko, eta balizko arazoak konpontzen laguntzeko.
Hitzordua leku publikoetan egitea lehenetsiko da: kalean, tabernetan, elkarteetan… saiakera ikusgarria izan dadin eta kale erabileran eragina izan dezan ere badirelako horren helburu.
Aurten Mintzalagun egitasmoaren barruan berrikuntza bat txertatu dute: Gurasolagun. Talde horiek berezitasunak izango dituzte, izan ere, ume txikiak dituzten gurasoak izateaz gain, umeekin batera ekintzak egiteko aukera ere aurreikusi baitute antolatzaileek.
Patxi Azparren dinamizatzaileak xehetasun gehiago eman ditu ondoko bideoan:
