Ipar martxa irteera Zarautz eta Getariara, Urdabururekin
Urriaren 7an, larunbatarekin egingo dute irteera 12 kilometroko ibilbidea osatzeko.
Zarautz eta Getaria arteko bidea Santa Barbaratik. Ipar martxa ibilaldia antolatu du Urdaburu Mendizale Elkarteak urriaren 7rako, larunbata. Zarautz-Getaria-Zarautz 12 kilometroko ibilbidea egingo dute. Erromatarren galtzada aldapatsu bat igota, Santa Barbara ermitara helduko dira, eta handik Vista Alegre dorrerako bidea egingo dute. Mahasti artean Getariaraino helduko dira. Itzulera, itsas ondotik egingo dute, eta ibilaldia ez dela laua izango esan dute antolatzaileek.
Ibilaldian parte hartzen dutenei ura, kirol edo trekinggeko zapatilak, ipar martxako makilak eta mugi txartela eramateko eskatu diete. Aldez aurretik izena eman behar da, gainera, eta urriaren 6a izango da horretarako azken eguna. Urdabururen egoitzara jo behar da astearte eta ostegunetan 19:00etatik 21:00etara aurrez aurre egiteko, edota egun eta ordutegi beretan 943 52 78 79 edo 686 59 67 32 telefono zenbakietara deitu. Online ere egin daiteke, galdetegia beteta (egin klik hemen).
Galtzarabordako topoko geltokian elkartuko dira 08:20an—08:25ean irtengo da topoa— eta ez direla inoren zain izango jakinarazi dute Urdaburu elkartekoek, Donostian tren aldaketa egin beharko dutelako.
