'Tradizioak/Traizioak' erakusketan, kontserbazioa eta subertsioa aurrez aurre
21 Aulki zikloaren barruan antolatu dute erakusketa, eta urriaren 5etik 21era izango da ikusgai Oiartzungo Ehuntze Sormen Lantegian.
Ehuntze Sormen espazioa eta Metrokoadroka kolektiboak antolatutako 21 Aulki iniziatibaren barruan erakusketa egingo dute. aurtengo ekitaldian arte plastikoei zirrikitua zabaltzea dute asmoa, “diziplinartekotasunaren bidean arte plastikoak literaturarekin elkarrizketan jarriz”.
Onintza Etxebeste Lirasen Tradizioak/Traizioak erakusketa ikusi ahalko da urriaren 5etik 21era Ehuntze Sormen Lantegian —Manuel Lekuona 10, behea—, eta Oiharna Arana, Goiatz Labandibar, Karmele Mitxelena, Olatz Mitxelena eta Itziar Ugarte idazleek erakusketako arte lanak oinarri hartuta testuak idatzi eta errezitatuko dituzte. Irekiera ekitaldia urriaren 5ean 18:00etan izango da, eta aurkezpena 19:00etan egingo dute.
Errezitaldia, berriz, urriaren 13an izango da 19:00etan.
Euskal iruditeriarekin lotutako esanahiak berrasmatzea du oinarri erakusketak, eta horretarako, herri ondare diren irudi tradizionalekin esperimentatu du sortzaileak, “gure erreferente kulturalen kontserbazioaren eta subertsioaren artean sortzen den eztabaidan kokatzen da prozesua”.
Erakusketa astelehenetik ostiralera bisitatu ahalko da 17:30etik 19:30era, eta larunbatetan 11:00etatik 13:30era. Larunbatetan artista bertan izango da.
