Euskal nazio askapen mugimenduarekiko konpromisoa berretsi du Sortuk
Juan Paredes Manot Txiki eta Angel Otaegi Etxeberria ETAko kideak fusilatu zituztela 48 urte bete ziren atzo. Data gogoan hartuta Txiki eta Otaegi oroitu zituen Sortuk Foru Plazan egindako ekitaldian.
Irailaren 27aren harira ekitaldia egin du Sortuk. Argazkia: Sortu Juan Paredes Manot Txiki eta Angel Otaegi Etxeberria ETAko kideak fusilatu zituztela 48 urte bete ziren atzo. Haiekin batera fusilatu zituen erregimen frankistak FRAPeko Ramon Garcia Sanz, Xose Humberto Garcia Baena, eta Jose Luis Sanchez Bravo.
Data gogoan hartuta Txiki eta Otaegi oroitu zituen Sortuk Foru Plazan egindako ekitaldian: “Haiek bezalaxe, herri honen askatasunaren eta mundu justuago baten aldeko borrokan engaiatu diren guztiak oroitzeko gaude hemen, baina batez ere, euskal nazio askapen mugimenduarekiko eta askapen borrokarekiko gure konpromisoa berresteko. Euskal Herri independente, sozialista, feminista eta euskalduna lortu arte borrokan jarraitzeko konpromisoa berresteko”.
Txiki eta Otaegi fusilatuta Francoren erregimenak Euskal Herriaren nahia itotzea zuela helburu nabarmen jarri zuen Sortuk atzoko ekitaldian, “ez zuten lortu. Guk 48 urte geroago, Euskal herriaren askatasunaren aldeko borrokan engaiatuta segitzen dugu”.
Egungo egoera politikoaren irakurketa egin zuen gainera Sortuk. Haren ustetan perspektiba berri bat irekitzen ari da nazio askapen prozesua azkartzeko, iragan kurtso politikoa emankorra izan delako ezkerreko independentismoarentzat: “Aukera ireki dugu euskal preso, iheslari eta deportatu politikoen egoerari behin betiko konponbidea emateko, gatazka politikoaren gaineko eztabaida lehen lerrora ekartzeko, eta ezkerreko subiranistok esku eskura dugu hazten jarraitzeko eta lehen indarra bilakatzeko aukera”.
Euskal Errepublika ortzi-mugan, “oinarrizko kanpamendua gorago jartzeko aukera” esku-eskura dakusa Sortuk, “aitortza politikoan, burujabetzan, euskal lurraldeen arteko artikulazioan eta nazio eraikuntzan jauzia egiteko”. Horretarako, herri interesak lehenetsi beharra jarri du lehen lerroan, “herri akordio zabalak josiz, eta bulkada sozial indartsu bat eraikiz”.
Abuztuan zendu zen Graxi Etxebehere Ortzaizeko bake artisauaren hitzak ekarri zituen Sortuk gogora ekitaldia bukatzeko: “Bakotxa da kutxa hunen aberastasunik handiena. Zendako? Zin egin baitiogu Euskal Herriari bere lekua munduan eta geroan finkatuko diogula. Aitzina, jo aitzina. Aurrera, lagunak aurrera”.
