LAB sindikatuko emakumeak greba feminista orokorra lantzen hasi dira
Azaroaren 30eko grebaren prestatzeko sindikatuko 300 bat emakume elkartu dira Landetxen. Zaintza eredua "irauli" behar dela uste dute.
Sindikatuko 300 bat emakume elkartu dira, grebaren prestaketa hasteko. LABeko 300 bat emakume Landetxeko aretoan elkartu dira gaur goizean. Azaroaren 30eko greba orokor feminista prestatzen hastea izan da batzarraren helburua.
Garbiñe Aranburu sindikatuko idazkari nagusiak komunikabideen aurrean azaldu du bileraren zergatia. Jakinarazi duenez, grebaren prestaketan “buru-belarri” sartuta daude.
Datorren astetik aurrera delegatuen bilerak egingo dituzte eskualde guztietan, Aranburuk iragarri duenez.
Greba orokor feministaren arrazoiak xehatu ditu LABeko idazkari nagusiak: “Zaintza eredua irauli beharra dago. Zaintza krisian dago, eta krisiaren arrazoi nagusia ez da bilakaera demografikoa, edo jendartearen zahartzea”.
Aranbururen esanetan, krisi horren arrazoia da emakumeak “planto egiten” ari direla, sistema “bidegabea” eta “jasanezina” delako. “Batez ere, emakumeon bizkar gainean erortzen delako”, esan du Aranburuk.
Kaltetuenak emakume “migratu eta arrazializatuak” direla gaineratu du.
Horregatik, zaintza “kolektibizatzea” aldarrikatu du. “Zaintza-lanak aitortu eta berrantolatu egin behar dira, eta zaintza-sistema publiko bat eratu behar da”.
Horregatik guztiagatik, azaroaren 30ean kalera aterako direla jakinarazi du, “mugimendu feministarekin eskuz esku elkarlanean”.
