Hemezortzi txorrota eta 130 boluntario, gaur hasiko den Lezoko Garagardo Festan
Gaurtik larunbatera Karlos Saldise plaza garagardoaren zaleen bilgune izango da. Hemezortzi garagardo ezberdin dastatzeko aukera izango da.
Gaur hasiko da Tiñelu elkarteak antolatzen duen Garagardo Festa. 18:00etan zabalduko dute Karlos Saldise plazako festa gunea. Era askotako garagardoak dastatu eta jaki goxoekin gozatzeaz gain, badira hainbat jarduera osagarri.
Osotara hemezortzi garagardo klase daude feriaren barruan, horitako bat alkoholik gabekoa, eta beste bat glutenik ez duena. Tiñeluko kideek adierazi dutenez, osotara 130 lezoar izango dira lanean gaurtik larunbatera arte dena behar bezala joan dadin, bai sukaldean zein txorroten eremuan. Egunero 18:00etan zabalduko dute festa eremua.
Egitarauari dagokionez, gaur Orlis Pineda kantautore kubatarrak doinu beroak eramango ditu Saldisera, 22:30ean hasita. Jaixkipe txarangak girotuko du gunea bihar (ostirala), 23:00etatik aurrera. Larunbatean, berriz, 22:15ean Traband taldeak kontzertua emango du, eta gauerdian hasiko dira Xala eta Garazi Saldise astintzen.
Tiñeluko antolatzaileek adierazi dute lan latza egin behar izan dutela aurtengoan ere txanda guztiak betetzeko. Baina hala ere, herritarren babesa eta atxikimendua jaso dutela, ez baita nolanahikoa 130 laguneko lantaldea osatzea.
